ججن جي استعيفيٰ جو سلسلو بند نه ٿيندو، ملڪ آئين ۽ قانون تحت هلي رهيو آهي : ملڪ احمد خان

پنجاب اسيمبلي جي اسپيڪر ملڪ احمد خان چيو آهي ته ججن جي استعيفيٰ جو سلسلو بند نه ٿيندو، ملڪ آئين ۽ قانون تحت هلي رهيو آهي، پارليامينٽ سپريم ۽ حڪومت عوام جي مفاد ۾ صاف ۽ شفاف قانونسازي ڪري رهي آهي، سڀني جي ماضي جي خبر آهي ته ڪنهن ڪهڙي نموني فيصلا ڪيا، سوشل ميڊيا تي اجائي واويلا ڪئي پئي وڃي. لاهور ۾ ميڊيا سان ڳالهائيندي ملڪ احمد خان چيو ته حڪومت عوام جي مفاد ۾ صاف ۽ شفاف قانونسازي ڪري رهي آهي، سڀ ڄاڻن ٿا ته ماضي ۾ ڪير ڪيئن ۽ ڪهڙي طرح فيصلا ڪندو هو. سندس چوڻ هو ته ڇا نواز شريف کي حڪومت مان ڪڍڻ درست فيصلو هو؟، ڇا يوسف رضا گيلاني کي هٽائڻ صحيح هو. پنجاب اسيمبليءَ جي اسپيڪر چيو ته پارليامينٽ سپريم آهي، ججن جي استعيفيٰ جو سلسلو نه رڪجندو، اهڙا جج آهن جيڪي هڪ پارٽي کي سزا ڏيڻ چاهن ٿا، هو پنهنجو ڪم ايمانداري سان ڪندڙ ججن کي سلام پيش ڪن ٿا. ملڪ احمد خان چيو ته استعيفيٰ ڏيندڙ ججن مان هڪ جج هڪ سياسي پارٽي کي انصاف ڏيڻ ئي انصاف سمجهندو هو، عمر عطا بنيال جا جانبدار فيصلا هئا، ثاقب نثار ۽ ٻين ججن جون جانبداريون رهيون. هن چيو ته عدالتي فيصلن ۾ آئين لکڻ جي ڪوشش مناسب ناهي، هڪ هڪ چيف جسٽس جي ڪورٽ ۽ فيصلو ويهه سال جو رڪارڊ ڏسي وٺو.