بي آوازن جو آواز ۽ لاوارثن جي وارث تنظيم جي ڊبليو سي راڻيپور جي پيراڻي حويليءَ ۾ زيادتيءَ بعد قتل ڪيل نينگري فاطمه ڦرڙو جو چاليهو 24 سيپٽمبر تي خانواهڻ ڀرسان ڳوٺ علي محمد ڦرڙو ۾ ملهائڻ جو اعلان ڪري ڇڏيو آهي.
جي ڊبليو سي جي ايگزيڪيوٽو ڪميٽيءَ جو اجلاس ڪراچيءَ ۾ ٿيو.
اجلاس ۾ نينگري فاطمه ڦرڙو جي ڪيس ۾ ٿيل اڳڀرائي، ٻارن ۽ هندو برادريءَ جي ماڻهن جي اغوا واري معاملي سميت سنڌ جي مجموعي معاشرتي صورتحال جو جائزو ورتو ويو.
اجلاس کي آگاهه ڪيو ويو ته جي ڊبليو سي بي آوازن جو آواز ۽ لاوارثن جي وارث بڻجي هر مظلوم سان گڏ بيٺي آهي، نينگري فاطمه ڦرڙو جي زيادتيءَ بعد قتل کانپوءِ سڀ کان پهرين جي ڊبليو سي ئي اِن معاملي تي آواز اٿاري سمورن ملوث ڪردارن کي وائکو ڪيو.
جي ڊبليو سي فاطمه ڦرڙو جي خون سان انصاف لاءِ سنڌ جي گاديءَ واري شهر ڪراچي، سنڌ جي ٻيو نمبر وڏي شهر حيدرآباد، خيرپور، خانواهڻ ۽ قاضي احمد ۾ وڏا احتجاجي مظاهرا ڪري ڌرڻا هنيا، جن ۾ هزارين ماڻهن شرڪت ڪئي.
اجلاس کي ٻڌايو ويو ته سنڌ جاڳرتا جي نئين دور ۾ داخل ٿي وئي آهي ۽ سنڌ جي عوام جي ڊبليو سي جي جاڳرتا واري جدوجهد کي ڀرپور موٽ ڏني آهي.
اجلاس ۾ فاطمه ڦرڙو سان خون سان انصاف لاءِ جدوجهد جاري رکڻ جو فيصلو ڪندي طئه ڪيو ويو ته 24 سيپٽمبر آچر ڏينهن شهيد نياڻيءَ جو چاليهو جي ڊبليو سي پاران خانواهڻ ڀرسان سندس ڳوٺ علي محمد ڦرڙو ۾ ڪيو ويندو.
اِن سلسلي ۾ چاليهي جي موقعي تي هڪ وڏو ميڙ پڻ ڪيو ويندو، جنهن لاءِ سنڌ جي ساڃاهه وندن، ليکڪن، شاعرن، وڪيلن، ڊاڪٽرن، انجنيئرن سميت سول سوسائٽيءَ جي تنظيمن توڙي عورتن ۽ ٻارن جي حقن لاءِ ڪم ڪندڙ تنظيمن کي دعوت ڏني ويندي.
جي ڊبليو سي طرفان سمورين ڌرين کي اپيل ڪئي وئي ته اُهي 24 سيپٽمبر تي خانواهڻ ڀرسان ڳوٺ علي محمد ڦرڙو ۾ فاطمه ڦرڙو جي چاليهي تي رٿيل تقريبن ۾ ڀرپور نموني شرڪت ڪري شهيد نياڻيءَ جي وارثن کي لاوارث ٿيڻ کان بچايو وڃي.
