حيدرآباد ۾ صحافين، ليکڪن ۽ سول سوسائٽيءَ جي تنظيم جي ڊبليو سي طرفان راڻيپور جي پيرن جي حويليءَ ۾ زيادتي کانپوءِ بيدردي سان قتل ٿيل نينگري فاطما ڦرڙو جي خون سان انصاف لاءِ احتجاجي ريلي ڪڍي ڌرڻو هنيو ويو، جنهن ۾ ماڻهن جي وڏي انگ شرڪت ڪئي.
جرنلسٽس رائيٽرس، سول سوسائٽي فار ٽرٿ، پيس اينڊ جسٽس طرفان معصوم نينگري فاطمه ڦرڙو جي خون سان انصاف لاءِ حيدرآباد ۾ اولڊ ڪيمپس کان پريس ڪلب تائين احتجاجي ريلي ڪڍي ڌرڻو هنيو ويو.
احتجاج ۾ سول سوسائٽي جي اڳواڻن، صحافين، ليکڪن، شاعرن، وڪيلن، ڊاڪٽرن، سياسي، سماجي اڳواڻن، قومپرست ڌرين، عورتن ۽ ٻارن سميت هزارين ماڻهن شرڪت ڪئي.
احتجاج ڪندڙن جي هٿن ۾ بينر ۽ پلي ڪارڊ کنيل هئا، جن تي فاطمه جي خون سان انصاف ڪريو ۽ فاطمه جي قاتلن کي گرفتار ڪريو سميت ٻيا نعرا لکيل هئا.
جي ڊبليو سي جي مرڪزي صدر ذوالفقار خاصخيليءَ ۽ شوڪت نوناريءَ جي اڳواڻيءَ ۾ ٿيل احتجاج ۾ جسقم جي ڊاڪٽر نياز ڪالاڻي ۽ حيدرآباد جي مختلف سياسي سماجي اڳواڻن پڻ شرڪت ڪئي.
احتجاج کي خطاب ڪندي اڳواڻن چيو ته نينگري فاطمه ڦرڙو جي خون سان انصاف ۾ دير تي خدشا پيدا ٿي رهيا آهن.
هنن چيو ته گرفتار پير اسد علي شاهه جي گهر واري حنا شاهه ۽ فياض شاهه به اڃا تائين گرفتار نه ٿي سگهيا آهن.
سندن چوڻ هو ته انصاف لاءِ آواز اٿاريندڙن کي ڌمڪيون ڪنهن به صورت ۾ قبول نه آهن. اڳواڻن مطالبو ڪيو ته فاطما ڦرڙو ڪيس جي جاچ جلد مڪمل ڪري خون سان انصاف ڪيو وڃي.
