خيرپور ۾ آل اسڪارپ ليبر يونين ۽ سب انجنيرز ڪلارڪ ايسوسيئشن اسڪارپ پراجيڪٽ جي سوين ملازمن طرفان سياسي بنيادن ۽ پيسن عيوض ڀرتي ڪرڻ خلاف ٻئي ڏينهن به احتجاجي مظاهرو ڪري ڌرڻو هنيو ويو.
احتجاج جي اڳواڻي سيد دين محمد شاهه،وقار ڀٽو، جاويد منگي، سعيد مھيسر، مشتاق گوپانگ ۽ ٻين ڪئي.
احتجاج ڪندڙ جو چوڻ هو ته سياسي ماڻهن جي مداخلت ۽ ڪرپشن جي ڪري واپڊا اسڪارپ کاتو تباهي جي ڪناري تي پهتو آهي.
هنن چيو ته سياسي ماڻهن ۽ ڪامورن ميرٽ جي لتاڙ ڪري ساڍا چار سئو نوڪريون من پسند ماڻهو کي پيسن عيوض ڏنيون ويون آهن.
احتجاج ڪندڙن الزام هڻندي چيو ته ڊپٽي ڪمشنر جي ماڻهن هڪ کان 4 گريڊ واريون نوڪريون اٺن کان ڏهن لکن ۾ وڪرو ڪري ميرٽ جي لتاڙ ۽ عوام جي حقن تي ڌاڙو هنيو آهي.
اڳواڻن چتاءُ ڏيندي چيو ته جيڪڏهن سياسي ڀرتيون ختم نه ڪيون ويون ته ڊي سي آفيس خيرپور آڏو ڌرڻو هنيو ويندو.
