امريڪي پرڏيهي کاتي جي ترجمان ويدانت پٽيل چيو آهي ته آمريڪا دهشتگردي خلاف جنگ ۾ پاڪستاني حڪومت جي ڪوششن جي حمايت ڪري ٿو.
آمريڪي پرڏيهي کاتي جي ترجمان پريس بريفنگ ۾ چيو ته کين ڄاڻ آهي ته پاڪستاني حڪومت ٽٽي وئي آهي، هو نگران وزيراعظم ۽ سندس ٽيم سان گڏ ڪم ڪرڻ لاءِ تيار آهن، پاڪستان ۾ آزاد ۽ شفاف چونڊون چاهين ٿا.
آمريڪي اسٽيٽ ڊپارٽمينٽ جي ترجمان چيو ته گڏيل دلچسپي وارن شعبن ۾ پاڪستان سان سهڪار جاري رکندا، پاڪستان ۾ معاشي استحڪام، خوشحالي ۽ سلامتي چاهين ٿا گڏو گڏ آزاد چونڊون، جمهوريت ۽ قانون جي حڪمراني جا خواهشمند آهن.
آمريڪي پرڏيهي کاتي جي ترجمان چيو ته افغانستان بابت تفصيلي ڳالهه ٻولهه لاءِ پاڪستاني قيادت سان رابطي ۾ آهن، دهشتگردي خلاف پاڪستان سان ڳالهيون ۽ مشاورت جاري آهن، علائقائي استحڪام کي پيش ايندڙ خطرن کي منهن ڏيڻ لاءِ پاڪستان ۽ آمريڪا جا مفاد ساڳيا آهن.
ويدانت پٽيل وڌيڪ چيو ته دهشتگردن ۽ دهشتگرد گروپن کي منهن ڏيڻ لاءِ پاڪستان سان گڏجي ڪم ڪرڻ لاءِ تيار آهن، قانون جي بالادستي تحت شهرين جي جان ۽ مال جي تحفظ کي يقيني بڻايو وڃي.
