سنڌ بار ڪائونسل ڪئنالن خلاف اڄ بائڪاٽ جو اعلان

سنڌ بار ڪائونسل جي سڏ تي وڪيلن پاران سنڌو درياهه مان ڪئنال ڪڍڻ خلاف مختلف شهرن ۾ عدالتي ڪاررواين جو بائيڪاٽ ڪري احتجاجي مظاهرا ڪيا ويا آهن. نوابشاهه بار ايسوسيئيشن جي وڪيلن پاران عدالتي ڪاررواين جو بائيڪاٽ ڪيو ويو. قمبر ۾ به ڊسٽرڪٽ بار جي وڪيلن عدالتي ڪاررواين جو بائيڪاٽ ڪري وڪيل مجيد خاصخيلي، علي بخش چانڊيو، اسد علي بليدي ۽ ٻين جي اڳواڻي ۾ احتجاجي مظاهرو ڪيو. ان موقعي تي وڪيل اڳواڻن جو چوڻ هو ته سنڌو درياهه مان ڪنهن به صورت ۾ ڪئنال ڪڍڻ نه ڏنا ويندا، ڪئنال ڪڍيا ويا ته سنڌ جون زمينون بنجر بڻجي وينديون. هنن چيو ته سنڌو درياهه ۾ اڳ ئي پاڻي موجود ناهي، ڪئنال ڪڍيا ويا ته سنڌو درياهه سڪي ويندو ۽ سنڌ جي زراعت تباهه ٿي ويندي.