سنڌ جي مختلف شهرن ۾ روڊ حادثن جي نتيجي ۾ 3 ڄڻا فوت ٿي ويا، جڏهن ته هڪ ٻارڙي سميت 3ڄڻا زخمي ٿي پيا .
پني عاقل ويجهو قومي شاهراهه تي ٽرالر جي ٽڪر ۾ ڳوٺاڻو فوت ٿي ويو.
عبدالخالق عرف خاڪن سميجو ڳوٺ وڃي رهيو هو ته مٿس ٽرالر چڙهي ويو، پوليس ٽرالر کي تحويل ۾ وٺي ڊرائيور کي لاڪ اپ ڪري ڇڏيو.
شهدادپور ويجهو تيز رفتار ڪار جي ٽڪر ٽئين ڪلاس جو شاگرد فوت ٿي ويو.
شاهپور چاڪر-نوابشاهه روڊ تي ڪوس گهر وٽ تيز رفتار ڪار جي ٽڪر ۾ 8ورهين جو نينگر دلشير پٽ خالد حاجاڻو فوت ٿي ويو، جڏهن ته پوليس ڪار ڊرائيور کي گرفتار ڪري ورتو.
ٽنڊي جان محمد ويجهو انب موري مين روڊ تي ٽرڪ ۽ موٽرسائيڪل وچ ۾ ٽڪر ٿي پيو.
حادثي جي نتيجي ۾ موٽرسائيڪل سوار نارو ڪولهي فوت ۽ سندس معصوم نياڻي زخمي.
مانجهد ويجهو لاکڙا ڪول مائنز لنڪ روڊ تي بريڪ فيل ٿيڻ سبب ٽرڪ ڪلٽي ٿيڻ جي نتيجي ۾ 2ڄڻا زخمي ٿي پيا.
اطلاع تي پوليس حادثي واري هنڌ پهچي زخمي ٿيل حسنين بلوچ ۽ شان بلوچ کي اسپتال منتقل ڪيو، جڏهن ته سندن حالت خطري کان ٻاهر آهي
