سنڌ جي گورنر ڪامران ٽسوري سنڌ ڳوٺ آباد اسڪيم ترميمي بل تي صحيح کان انڪار ڪندي واپس موڪلي ڇڏيو، سندس چوڻ آهي ته ڳوٺ آباد هائوسنگ اسڪيم جي سيڪشن ٽي ۾ ترميم قبول ناهي، ترميم سان حقدار شخص کي ٻن بدران 3 ويسا زمين الاٽ ڪرڻ جا اختيار ڏنا ويا آهن.
سنڌ جي گورنر ڪامران ٽسوري آئين جي آرٽيڪل 116، ٽو بي تحت حاصل اختيار استعمال ڪندي دي سنڌ ڳوٺ آباد ترميمي بل 2023ع صحي ڪرڻ کانسواءِ واپس ڪري ڇڏيو.
گورنر سنڌ ڪامران ٽسوري جو چوڻ آهي ته بل ۾ دي سنڌ ڳوٺ آباد ايڪٽ 1987ع جي سيڪشن ٽي ۾ ترميم ڪئي وئي آهي ۽ هن ۾ ڄاڻايل لفظ 2 کي 3 سان تبديل ڪيو ويو آهي.
سندس چوڻ هو ته هن ترميم تحت هاڻي الاٽمينٽ ڪميٽي کي ٻهراڙي جي علائقن ۾ حقدار شخص کي ٻن بدران 3 ويسا زمين الاٽ ڪرڻ جو اختيار هوندو.
گورنر سنڌ ڪامران ٽسوري چيو ته هي ڳالهه به قابل ذڪر آهي ته دي سنڌ ڳوٺ آباد ترميمي ايڪٽ 2008ع تحت ٻهراڙي کي ڪنهن تعلقي يا ٽائون ۾ به ٻهراڙي جي علائقي طور شمار ڪري سگهجي ٿو.
هن چيو ته جيڪڏهن ڪنهن ٽائون ۾ الاٽمينٽ ڪميٽي طرفان 3 ويسا زمين ڪنهن کي الاٽ ڪئي وڃي ٿي ته اها انتهائي زيادتي آهي.
گورنر سنڌ ڪامران ٽسوري چيو ته هن معاملي تي نظرثاني ڪرڻ لاءِ هي بل صوبائي اسيمبليءَ کي واپس اماڻيو پيو وڃي.
