سنڌ حڪومت اي وي ٽيڪسي سروس به شروع ڪرڻ جي خواهشمند آهي : شرجيل ميمڻ

سينيئر صوبائي وزير شرجيل ميمڻ عالمي سيڙپڪارن کي ٽرانسپورٽ جي شعبي ۾ سيڙپڪاري جي دعوت ڏني آهي. شرجيل انعام ميمڻ سان پرڏيهي سيڙپڪارن جي وفد ملاقات ڪئي، جنهن دوران ٽرانسپورٽ جي منصوبن تي خيالن جي ڏي وٺ ڪئي وئي. ملاقات دوران شرجيل انعام ميمڻ سيڙپڪارن کي ڪي سي آر، بلٽ ٽرين، بس مينو فيڪچرنگ پلانٽ، ايِ وي بسن ۽ بي آر ٽيز ۾ سيڙپ جي دعوت ڏني. پرڏيهي سيڙپڪارن ڪي سي آر، بلٽ ٽرين، بس پلانٽ ۽ اي وي ٽيڪس سروس شروع ڪرڻ ۾ دلچسپيءَ جو اظهار ڪيو. شرجيل ميمڻ جو چوڻ هو ته سنڌ حڪومت اي وي ٽيڪسي سروس شروع ڪرڻ جو ارادو رکي ٿي،ان سان روزگار جا نوان موقعا پيدا ٿيندا. هن چيو ته سنڌ سرڪار اي وي بسن ۽ اي وي ٽيڪسين لاءِ چارجنگ ڊيپوز قائم ڪرڻ سميت سيڙپڪارن جي هر ممڪن مدد ڪندي. شرجيل ميمڻ چيو ته ڪراچيءَ کان سکر تائين بلٽ ٽرين يا هاءِ اسپيڊ ٽرين وڏو منصوبو آهي، جنهن ذريعي لکين ماڻهو لاڀ حاصل ڪندا. سينيئر صوبائي وزير چيو ته سي پيڪ ۾ شامل ڪي سي آر اهم ترين منصوبو آهي، هو چاهن ٿا ته سيڙپڪار ان منصوبي ۾ سيڙپڪاري ڪن، ڌاٻيجي اڪنامڪ زون ۾ اي وي بسن جو پلانٽ وڏو منصوبو آهي.