پي ٽي آءِ باني جا الزام احتساب کان بچڻ ۽ سياسي عدم استحڪام کي هوا ڏيڻ لاءِ جاري مهم جو حصو آهن : شرجيل ميمڻ

سنڌ جي سينئر وزير شرجيل انعام ميمڻ باني پي ٽي آءِ جي آرمي چيف کي لکيل کليل خط بابت چيو آهي ته باني پي ٽي آءِ جا الزام احتساب کان بچڻ ۽ سياسي عدم استحڪام کي هٿي ڏيڻ جي مهم جو حصو آهن. صحافين سان ڳالهائيندي صوبائي وزير شرجيل ميمڻ جو چوڻ هو ته سڀئي آئيني ترميمون جمهوري عمل مان گذريون آهن، چونڊيل ججن بابت باني پي ٽي آءِ جا الزام گمراهه ڪندڙ آهن. هن چيو ته باني پي ٽي آءِ پاڻ 2018 ۾ اليڪٽورل انجنيئرنگ جي الزامن وچ ۾ اقتدار ۾ آئي، باني پي ٽي آءِ پنهنجي دور ۾ ثاقب نثار کي استعمال ڪيو. هن افسوس جو اظهار ڪندي چيو ته اڳوڻي چيف جسٽس ثاقب نثار باني پي ٽي لاءِ هڪ ڪارڪن طور ڪم ڪيو، باني پي ٽي آءِ-ثاقب نثار جي ڳٺ جوڙ کي عوام اڄ تائين ناهي وساريو. شرجيل انعام ميمڻ جو چيو ته ثاقب نثار پي ٽي آءِ لاءِ هڪ ڪارڪن جي حيثيت سان ڪم ڪيو، ان جو پاڪستان جي تاريخ ۾ ڪو مثال ناهي. سندس چوڻ هو ته عوامي حمايت وڃائڻ کان پوءِ، پي ٽي آءِ جا باني جمهوري عمل کي بدنام ڪرڻ جي ڪوشش ڪري رهيا آهن، پنهنجي دور ۾ پي ٽي آءِ باني عدليه تي غير ضروري اثر وجهڻ جي ڪوشش ڪئي، سندس موجوده شڪايتون منافقت تي ٻڌل آهن. هن وڌيڪ چيو ته ذاتي سياسي فائدي لاءِ رياستي ادارن کي بدنام ڪرڻ غير ذميواراڻو ۽ قومي استحڪام لاءِ نقصانڪار آهي، جمهوري ادارن جو احترام ڪرڻ گهرجي ۽ غلط بياني پکيڙڻ کان پاسو ڪرڻ گهرجي. شرجيل انعام ميمڻ چيو ته پاڪستان کي سياسي پختگي ۽ استحڪام جي ضرورت آهي، ذاتي رنجش جي ڪري ورهائيندڙ بيان بازي جي نه.