پيپلزپارٽيءَ تڪبنديون ڊسمبر تائين مڪمل ڪرڻ واري اليڪشن ڪميشن جي فيصلي تي نظرثاني ڪري آئين تحت 90 ڏينهن اندر چونڊون ڪرائڻ جو مطالبو ڪيو آهي، نثار احمد کهڙي جو چوڻ آهي ته فيبروري ۾ عام چونڊون ڪرائڻ جي ڳالهه آئين جي ڀڃڪڙي آهي، اليڪشن ڪميشن آئين تحت 90 ڏينهن اندر چونڊون ڪرائڻ جي پابند آهي.
ڪراچي ۾ سعيد غني ۽ وقار مهدي سان گڏ پريس ڪانفرنس ڪندي پ پ سنڌ جي صدر نثار کهڙي چيو ته اليڪشن ڪميشن جي تڪبندين جي فيصلي بعد فيبروري ۾ چونڊون ڪرائڻ وارين ڳالهه کي هو خلاف آهن، اليڪشن ڪميشن آئين مٿانهين ناهي.
هن چيو ته اليڪشن ڪميشن آئين تحت 90 ڏينهن اندر چونڊون ڪرائڻ جي پابند آهي، وقت تي چونڊون نه ٿيون ته جمهوري طريقي سان جدوجهد ڪئي ويندي.
نثار کهڙي چيو ته چونڊن ۾ دير ٿي ته شفاف ۽ پرامن اقتدار جي منتقلي تي سوال اٿندا، اليڪشن ڪميشن ۽ چيف اليڪشن ڪمشنر کان مطالبو آهي ته تڪبندين جي مدي واري فيصلي تي نظرثاني ڪري وقت تي چونڊون ڪرايون وڃن.
پ پ سنڌ جي صدر چيوته اسيمبليون رڳو نگران حڪومت آڻڻ لاءِ نه پر شفاف چونڊن لاءِ ٽوڙيو ويو، آدمشماري جي سي سي آءِ مان منظوري خلاف سپريم ڪورت ۾ داخل درخواست داخل آهي، هاڻي ڏسجي ته عدالت ڪهڙو فيصلو ڏي ٿي.
نثار کهڙي چيو ته تڪبنديون تبديل ڪرڻ جي ضرورت ناهي آبادي جي بنياد تي ووٽرن جو انگ وڌايو وڃي، تڪبنديون سان سيٽون نه ٿيو وڌن ته چونڊن ۾ دير جو ڪو به جواز ناهي.
پ پ سينيٽر چيو ته پي ٽي آءِ چيئرمين کي سياسي نظام ۽ ادارن کي برباد ڪرڻ لاءِ آندو ويو هو، اعتماد جو ووٽ وٺڻ بعد پنجاب اسيمبلي ٽوڙڻ جو ڪو به جواز نه هو، ملڪ ۾ جمهوري حڪومتون ئي ملڪ کي اڳتي وڌائي سگهن ٿا.
ان موقعي تي پاڪستان ڊيموڪريٽڪ پارٽيءَ جي اڳواڻ بشارت مرزا، ارتضيٰ بيگ، غلام صابر، عبدالحڪيم، محمد سليم، طارق حسن، وقار شيخ ۽ ٻين پ پ ۾ شموليت جو اعلان ڪيو
