ملڪ ۾ جون کان آگسٽ تائين معمول کان وڌيڪ برساتن جو امڪان

ملڪ ۾ جون کان آگسٽ تائين معمول کان وڌيڪ برساتن جو امڪان ظاهر ڪيو ويو آهي. موسميات کاتي  جون کان آگسٽ تائين چوماسي جي برساتن بابت آئوٽ لڪ جاري ڪري ڇڏيو آهي. هلندڙ سال جون کان آگسٽ دوران چوماسي ۾ ملڪ ۾ اڪثر هنڌن تي معمول ۽ معمول کان وڌيڪ برساتن جو امڪان آهي، وڌيڪ برساتن جو امڪان وچ ۽ اتر پنجاب ۾ هوندو. موسميات کاتي ڏکڻ سنڌ ۾ به معمول کان وڌيڪ برساتن جي اڳڪٿي ڪئي آهي، جڏهن ته بلوچستان ۾ به معمول کان وڌيڪ برساتن جو امڪان آهي، ڪي پي ۽ گلگت بلستان ۾ معمول موجب برسات پوندي. موسميات کاتي موجب وڌيڪ گرمي پد سبب مٿين علائقن ڪي پي، ڪشمير ۽ گلگت بلستان ۾ برف ڳڙن جو عمل تيز ٿي سگهي ٿو، ملڪ اڪثر هنڌن تي جون جي شروعات ۾  ڏينهن جو گرمي پد معمول کان وڌيڪ رهندو، برساتن بعد گرمي معمول تي اچي ويندي. چوماسي دوران طوفان ۽ تيز هوائون هلنديون، جڏهن ته برساتن سبب درياهن ۾ ٻوڏ واري صورتحال ٿي سگهي ٿي، شهرن ۾ اربن فلڊ جو به خدشو آهي، ڪوه سليمان سميت ٻين جابلو علائقن ۾ به ٻوڏ جو امڪان آهي……….