راڻيپور جي عدالت حويلي ۾ زيادتي کانپوءِ قتل ٿيل نينگري فاطما ڦرڙو ڪيس جي مک جوابدار اسد علي شاهه کي وڌيڪ هڪ ڏينهن جي رمانڊ تي پوليس حوالي ڪري ڇڏيو، جڏهن ته صحافين ۽ پوليس اهلڪارن کي ڌمڪين جي ڪيس ۾ جوابدار اڪبر ڪلهوڙو جيل حوالي ڪيو ويو ۽ پير اسد علي شاهه جي ڊرائيور تي ڏوهه ۾ مدد ڪرڻ جو ڪيس داخل ڪيو ويو آهي.
راڻيپور جي عدالت ۾ حويلي ۾ زيادتي کانپوءِ قتل ٿيل نينگري فاطما ڦرڙو ڪيس جي ٻڌڻي ٿي.
ٻڌڻي دوران رمانڊ مڪمل ٿيڻ تي ڪيس جي مک جوابدار اسد شاهه کي پوليس عدالت ۾ پيش ڪيو.
ڪيس جي جاچ آفيسر ايس ايڇ او بچل قاضي عدالت کي اپيل ڪندي چيو ته هي ڪيس هاءِ پروفائل ٿي چڪو آهي هن ڪيس کي دهشتگردي ٽوڙ عدالت ۾ هلايو وڃي.
پوليس ڪيس ۾ امتياز ميراثي کي به نامزد ڪري ڇڏيو جنهن بعد جوابدارن جو انگ وڌي 4 ٿي ويو.
پوليس امتياز ميراثي کي به عدالت ۾ پيش ڪري ڇڏيو.
عدالت ڪيس جي مک جوابدار اسد شاهه کي هڪ ڏينهن جي جسماني رمانڊ تي پوليس حوالي ڪري ڇڏيو.
راڻيپور پوليس صحافين ۽ پوليس اهلڪارن کي ڌمڪين جي ڪيس ۾ جوابدار اڪبر ڪلهوڙي کي ٽن ڏينهن جو جسماني رمانڊ مڪمل ٿيڻ تي عدالت ۾ پيش ڪيو.
عدالت جوابدار اڪبر ڪلهوڙو جيل حوالي ڪري ڇڏيو.
راڻيپور پوليس گرفتار جوابدار اسد شاهه جي ڊرائيور اعجاز قاضي تي مدد ڪرڻ جو ڪيس داخل ڪري ڇڏيو.
ايس ايڇ او بچل قاضي جي فرياد تي جوابدار اعجاز قاضي خلاف ڪيس داخل ڪيو ويو.
ڪيس جي متن موجب، پوليس گشت ڪري رهي هئي ته جوابدار اعجاز قاضي ابل واهه تي پوليس کي ڏسي گهٻرائجي ويو، پڇا ڳاڇا ڪرڻ تي خبر پئي ته جوابدار فياض شاهه ۽ حنا شاهه کي گاڏي ۾ کڻي اڻڄاتل هنڌ ڇڏي آيو آهي.
ڪيس ۾ ڄاڻايو ويو آهي ته جوابدار اعجاز قاضي فاطما ڪيس ۾ جوابدارن جي مدد ڪرڻ تي سندس خلاف ڪيس داخل ڪيو ويو..
