هيليڪاپٽر حادثي ۾ فوت ايراني صدر ابراهيم رئيسي مشهد ۾ مٽيءَ ماءُ حوالي

هليڪاپٽر  حادثي ساٿين سميت فوت ٿيل ايراني صدر ابراهيم رئيسي کي مشهد ۾ امام رضا جي روضي جي اڱڻ ۽ پرڏيهي وزير امير  عبداللهيان کي تهران ۾ مٽيءَ ماءُ حوالي ڪيو ويو. ايراني ميڊيا موجب خميس ڏينهن منجهند ٽين وڳي صوبائي گادي واري شهر مشهد جي هوائي اڏي تي صدر ابراهيم رئيسي ۽ سندس سانٿين جا تابوت پهتا ته لکين ماڻهن ڪارا ويس پهري سندس آجيان ڪئي ۽ اکين مان لڙڪ لاڙيندا رهيا. سوڳوارن صدر جون تصويرون کڻي کيس ڀيٽا پيش ڪئي. ان کان اڳ  رئيسي ۽ سندس ساٿين جي ڏکڻ خراسان صوبي جي شهر بيرجند ۾ شاندار آجيان ڪئي وئي، جتان هون مارچ ۾ اوڀر صوبي جي نمائندي طور چونڊيو ويو هو. تقريبن جي پڄاڻيءَ بعد ابراهيم رئيسي کي مشهد ۾ امام رضا جي روزي جي اڱڻ ۾ مٽيءَ ماءُ حوالي ڪيو ويو. هيليڪاپٽر حادثي ۾ فوت ٿيل ايراني پرڏيهي امير عبداللهيان کي تهران شهر جي ڏکڻ ۾ شاهه عبدالعظيم جي مزار وٽ مٽيءَ ماءُ حوالي ڪيو ويو، سندس آخري رسمين ۾ لکين ماڻهن شرڪت ڪئي ۽ کيس شهيد قرار ڏنو ويو.