ثقافت ۽ سياحت واري صوبائي وزير ذوالفقار علي شاهه چيو آهي ته يونيسڪو جي سهڪار سان جلد مڪليءَ جي مقبرن ۽ موهن جي دڙي جي تاريخي هنڌن جي تحفظ تي ڪم شروع ڪيو ويندو.
سيد ذوالفقار علي شاهه سان گڏيل قومن جي تعليمي، سائنسي ۽ ثقافتي تنظيم جي ٻه رڪني وفد ملاقات ڪئي، جنهن ۾ مشهور آڪيالاجسٽ ڊاڪٽر ڪرسٽينا ۽ جواد شامل هئا.
ملاقات ۾ ثقافت وارو سيڪريٽري خالد چاچڙ، ايم ڊي سياحت فياض شاهه ۽ ڊائريڪٽر آڪيالاجي عبدالفتاح شيخ موجود هئا.
وفد سيد ذوالفقار علي شاهه کي ثقافت ۽ سياحت جي وزارت سنڀالڻ تي واڌايون ڏنيون، ملاقات دوران عالمي ورثو قرار ڏنل مڪلي جي تاريخي مقبرن جي تحفظ واري پراجيڪٽ تي ڳالهيون ڪيون ويون.
ڊاڪٽر ڪرسٽينا جو چوڻ هو ته دنيا ۾ عالمي ورثو قرار ڏنل ورثن ۾ مڪلي جا مقبرا به وڏي اهميت رکن ٿا، سنڌ جي قديم ۽ تاريخي ورثن پنهنجي تهذيت ۽ ثقافت ذريعي پوري دنيا جو ڌيان ڇڪايو آهي.
ان موقعي تي سيد ذوالفقار علي شاهه چيو ته يونيسڪو جي سهڪار سان جلد مڪليءَ جي مقبرن ۽ موهن جي دڙي جي تاريخي هنڌن جي تحفظ تي ڪم شروع ڪيو ويندو.
هن چيو ته يونيسڪو جي سهڪار سان ڀنڀور اندر واٽر هيريٽيج ايڪسپلوريشن پراجيڪٽ تي به ڪم شروع ڪيو ويندو.
ذوالفقار علي شاهه چيو ته منصوبي تي ڪم ڪرڻ لاءِ سڄي دنيا جي مشهور ماهرن جون خدمتون حاصل ڪيو وينديون.
صوبائي وزير، وفد کي موهن جي دڙي مان ملندڙ نوادرات جا نقل ۽ ٽوپي اجرڪ جا تحفا پيش ڪيا.
