ڊپٽي ڊائريڪٽر اينٽي ڪرپشن ڏکڻ مقررين ۽ بدلين ۾ رشوت وٺڻ جي سمورن الزامن کي سختي سان رد ڪري ڇڏيو

ڊپٽي ڊائريڪٽر اينٽي ڪرپشن ڏکڻ مقررين ۽ بدلين ۾ رشوت وٺڻ جي سمورن الزامن کي سختي سان رد ڪري ڇڏيو. ڊپٽي ڊائريڪٽر اسد ميراڻي ميڊيا سان ڳالھائيندي چيو ته اينٽي ڪرپشن کاتي ۾ مقررين ۽ بدلين تي رشوت وٺڻ جا سمورا الزام ڪوڙا آهن. سندس چوڻ هو ته ڊائريڪٽر اينٽي ڪرپشن اسٽيبلشمينٽ سنڌ امتياز ابڙو سختي سان حڪم ڏنو آهي ته ڪرپشن ڪنهن به صورت ۾ قبول ناهي. ڊپٽي ڊائريڪٽر اينٽي ڪرپشن ڏکڻ اسد ميراڻي چيو ته اينٽي ڪرپشن کاتي ۾ ڪو به آفيسر منٿلي نٿو وٺي، اهي جيڪي به رپورٽون يا الزام آهن اهي بي بنياد آهن. هن چيو ته اينٽي ڪرپشن ڏکڻ زون جنهن ۾ ضلعي ڏکڻ ۽ ڪورنگي جي سمورن آفيسرن کي هدايت ڪئي آهي ته جيڪڏهن رشوت جي شڪايت ملي ته ان آفيسر خلاف ڪارروائي ڪئي ويندي. ڊپٽي ڊائريڪٽر اينٽي ڪرپشن ڏکڻ چيو ته سندن ڪرپشن خلاف ڪاروايون جاري آهن، هڪ مهيني ۾ ٻه ڪيس داخل ڪيا آهن ۽ ڪتريون ئي انڪوائريون جاري آهن. اسد ميراڻي چيو ته جيڪڏهن ميڊيا وارا ڪرپشن بابت ڪا نشاندهي ڪئي ته انڪوائري ڪئي ويندي، ڪجهه عرصو اڳ سندس ڊپٽي ڊائريڪٽر ڏکڻ طور مقرري ٿي آهي پر هو قسم کڻي ٿو ڪنهن کي به رشوت طور هڪ رپيو به نه ڏنو آهي اهڙا الزام بي بنياد آهن هو الزامن کي رد ڪري ٿو.