ڪچي ۾ ڌاڙيلن خلاف آپريشن لاءِ سي پي ايل سي کان ٽيڪنيڪل مدد وٺڻ جو فيصلو ڪندي ڪچي ۾ ڊيوٽي ڪندڙ پوليس اهلڪارن کي خاص الائونس ڏيڻ جو اعلان ڪيو ويو آهي، آءِ جي سنڌ غلام نبي ميمڻ جو چوڻ آهي ته ڌاڙيلن خلاف آپريشن ۽ مغوين جي بازيابيءَ لاءِ سي پي ايل سي کان ٽيڪنيڪل مدد حاصل ڪئي ويندي، ڪچي ۾ مقرر پوليس اهلڪارن کي 10 هزار رپيه خاص الائونس ڏنو ويندو، شهرين کي لالچ ڏئي ۽ هرکائي اغوا ڪرڻ پوليس لاءِ چئلينج آهي.
آءِ جي سنڌ غلام نبي ميمڻ جي صدارت هيٺ ڪچي واري علائقي ۾ ڌاڙيلن خلاف آپريشن ۾ يقيني ڪاميابيءَ لاءِ حڪمت عملي بابت اجلاس ٿيو، جنهن ۾ ڊي آءِ جيز ۽ ايس ايس پيز وڊيو لنڪ ذريعي شرڪت ڪئي.
غلام نبي ميمڻ جو چوڻ هو ته ڪچي ۾ ڌاڙيلن خلاف منظم ڪاررواين ۽ مغوين جي حفاظت سان بازيابي لاءِ سي پي ايل سي ٽيڪنيڪل سپورٽ کي به ممڪن بڻايو ويندو.
هن چيو ته ڪچي ۾ مقرر اهلڪارن کي 10 هزار ماهوار الائونس جي فراهمي لاءِ سمورا قدم کنيا ويا آهن، پر اهو الائونس ڪنهن گارڊ يا گن مين توڙي ٻئي اسٽاف کي هرگز نه ڏنو ويندو.
آءِ جي سنڌ چيو ته سنڌ ۾ موجود ڪچي وارن علائقن مان شهرين کي عورتاڻي آواز تي هرکائي اغوا ڪرڻ وارا واقعا پوليس لاءِ وڏو چئلينج آهن، ان تي ضابطو آڻڻو پوندو.
غلام نبي ميمڻ چيو ته اهڙن واقعن کي روڪڻ لاءِ ڪچي ۾ پوليس چيڪ پوسٽون وڌيڪ فعال ۽ اثرائيتون بڻايون وڃن
