ڪراچي ۾ سنڌ جي گورنر ڪامران خان ٽيسوري سان نگران ناڻي واري وفاقي وزير شمشاد اختر ملاقات ڪئي آهي.
گورنر هائوس ۾ ملاقات دوران ملڪ کي پيش ايندڙ چئلينجز، معاشي صورتحال ۾ بهتري جي حڪمت عملي، ايڪسپورٽ ۽ گڏيل دلچسپي جي معاملن تي خيالن جي ڏي وٺ ڪئي پئي.
ان موقعي تي سنڌ جي گورنر ڪامران خان ٽيسوري چيو ته ڪراچي جي واپارين جي مسئلن جي حل لاءِ ڄاڻايل وزارتن جون ڪوششون ساراهه جوڳيون آهن.
سندس چوڻ هو ته معاشي چئلينجز کي منهن ڏيڻ لاءِ نگران وفاقي حڪومت جا قدم واکاڻ جوڳا آهن.
سنڌ جي گورنر وڌيڪ چيو ته ڊالر جو ايڪسچينج اگهه هيٺ اچڻ سان مختلف شعبن ۾ بهتري ايندي.
ڪامران خان ٽيسوري چيو ته سيڙپڪارن کي همٿائڻ ۽ کين سهولتون ڏيڻ سان سٺا نتيجا نڪرندا.
نگران ناڻي واري وفاقي وزير شمشاد اختر چيو ته سيڙپڪاري ۾ واڌ لاءِ سيڙپڪارن کي مختلف سهولتون ڏنيون پيون وڃن.
سندس چوڻ هو ته نگران وفاقي سرڪار ملڪ جي معاشي بحران مان ڪڍڻ لاءِ پرعزم آهي.
وفاقي وزير شمشاد اختر وڌيڪ چيو ته وفاقي حڪومت ۽ صنعتڪارن ۾ رابطي لاءِ سنڌ جو گورنر اهم ڪردار ادار ڪري رهيو آهي.
