توانائي واري صوبائي وزير ناصر شاهه چيو آهي ته 300 يونٽ مفت ڏيڻ واري واعدي تي عمل ڪيو پيو وڃي، بلاول ڀٽو زرداري وزيراعظم ٿئي ها ته سڄي ملڪ ۾ عوام کي 300يونٽ مفت بجلي فراهم ڪئي وڃي ها، پر هاڻي سنڌ تي لاءِ ڪم پيو وڃي.
ڪراچيءَ ۾ ورڪشاپ کي خطاب ڪندي سيد ناصر شاهه چيو ته توانائي بابت پاليسي ٺاهي آهي، جيڪڏهن ڪنهن کي صلاح ڏيني هجي ته ڏئي سگهي ٿو.
هن چيو ته هو پنهنجي صوبي ۾ سستي بجلي ڏيندا، سندن ڪوشش آهي ته ڪيپسٽي چارجز نه وڌن، اسٽيٽ بئنڪ سان به هو ان معاملي تي رابطي ۾ آهن.
ناصر شاهه چيو ته صدر آصف زرداري ۽ چيئرمين بلاول ڀٽو زرداريءَ وزيراعظم سان ملاقات ڪري بجلي جي بلن ۾ عوام کي رليف ڏيڻ جي ڳالهه ڪئي.
هن چيو ته هو چاهن ٿا ته پنهنجا سولر پارڪ هجن، جتان صنعتن کي بجلي فراهم ڪئي وڃي، غريب ماڻهن کي به سولر پينل فراهم ڪيا ويندا.
سيد ناصر شاهه چيو ته 300 کان وڌيڪ يونٽ بجلي استعمال ڪندڙن لاءِ بنا وياج قرض وارو نظام آندو ويندو ته جيئن ماڻهو آسانيءَ سان بل جمع ڪرائي سگهن.
