ڪوئيٽا مان جلسي تان واپس ايندڙ جيالن سان شڪارپور ۾ حادثو، 5 ڄڻا فوت

شڪارپور ۾ تيز رفتار کاهي ۾ ڪرڻ جي نتيجي ۾ پ پ تعلقه نوشهرو فيروز جي صدر سميت 5 ڄڻا اجل جو شڪار ٿي ويا، فوتين جا مڙهه گهر پهچائڻ تي گهر ڀاتين ۾ ڪهرام مچي ويو. باءِ پاس جِنو لنڪ روڊ  وٽ پيپلزپارٽي جي ڪوئيٽا واري جي جلسي ۾ شرڪت کانپوءِ نوشهروفيروز ويندڙ ڪار تيز رفتاري سبب ڀت سان ٽڪرائجڻ کانپوءِ کاهيءَ ۾ ڪري پئي. حادثي جي نتيجي ۾ ڪار ۾ سوار پنج ڄڻا فوت ٿي ويا. پوليس ۽ ايڌي رضاڪارن واقعي واري هنڌ پهچي فوتين جا لاش کڻائي سول اسپتال شڪارپور پهچايا، جتان ضروري ڪارروائي بعد مڙهه وارثن حوالي ڪيا ويا. حادثي ۾ فوت ٿيلن جو تعلق نوشهرو فيروز سان ٻڌايو پيو وڃي. فوتين ۾ پ پ نوشهرو فيروز تعلقي جو صدر خليفه شيڪل ميمڻ، پيپلز يوٿ تعلقه صدر مير نادر چانڊيو، حاجي ڳھڻو خان ٽڳڙ، مظفر ڀٽو ۽ رضوان احمد سومرو شامل آهن. پوليس جو چوڻ آهي ته حادثو تيز رفتاري ۽ ڪوهيڙي سبب پيش آيو آهي. حادثي ۾ فوت ٿيلن جو لاش گهر پهچائڻ تي گهر ڀاتين ۾ ڪهرام مچي ويو.