9مئي جو ڏينهن ملڪي تاريخ جو هڪ ڪارو ڏينهن آهي:بلاول ڀٽو زرداري

پ پ چيئرمين بلاول ڀٽو زرداري چيو آهي ته 9 مئي جو ڏهاڙو به ملڪي تاريخ جو هڪ ٻيو ڪارو ڏينهن آهي، انصاف جي گهرج آهي ته قائداعظم جي گهر ۽ فوجي ٿاڪن تي حملا ڪندڙن کي قانون کي منهن ڏيڻو پوندو. 9مئي سانحي جي ورسي تي پنهنجي پيغام ۾ بلاول ڀٽو زرداري چيو ته 9 مئي جا واقعا ملڪ ۾ ڏڦيڙ پکيڙڻ ۽ فسطائيت مڙهڻ جي ڪريل سازش هئي. سندس چوڻ هو ته سڀني کي خبر آهي ته 9 مئي جا مذمت واقعا ڪنهن جي چوڻ تي ڪيا ويا. پ پ چيئرمين بلاول ڀٽو زرداري چيو ته پاڪستان 9 مئي جي واقعن نظر انداز نٿو ڪري سگهي، ملڪ جي سياسي تاريخ ۾ ڪنهن سياسي پارٽي طرفان اهڙن قدمن جو مثال نٿو ملي. هن چيو ته ملڪ جا ڳجها دستاويز ليڪ ڪرڻ ۽ فوجي ٿاڪن تي حملا ڪرڻ سياست ناهي، ملڪ دشمني آهي. پ پ چيئرمين بلاول ڀٽو زرداري چيو ته پيپلزپارٽي اڄ به پنهنجي موقف تي قائم آهي ته 9 مئي واقعن جي چيف جسٽس جي سربراهيءَ ۾ جوڊيشل انڪوائري ٿيڻ گهرجي، پر پي ٽي آءِ سميت سمورين پارٽين کي خاطري ڪرائڻي پوندي ته جوڊيشل ڪميشن جو فيصلو مڃيو ويندو.