هيوي ٽريفڪ جي ڪراچي شهر ۾ داخلا جي حوالي سان ٽائيمنگ مقرر ڪئي ويندي، ڀڃڪڙي ڪندڙن خلاف سخت ڪارروائي ڪئي ويندي:آءِ جي سنڌ

آءِ جي سنڌ غلام نبي ميمڻ چيو آهي ته هيوي ٽريفڪ جي ڪراچي شهر ۾ داخلا جي حوالي سان ٽائيمنگ مقرر ڪئي ويندي، ڀڃڪڙي ڪندڙن خلاف سخت ڪارروائي ڪئي ويندي. ڪراچي ۾ متحده قومي موومينٽ جي اٺن اسيمبلي ميمبرن آءِ جي سنڌ سان ملاقات  ڪري شهر ۾ هيوي ٽريفڪ کي روڪڻ جي حوالي سان ڳالهه ٻولهه ڪئي وئي. سنڌ اسيمبلي جي ميمبر عامر صديقي، ارسلان پرويز، معيد انور،  فيصل رفيق، دانيال، انجنيئر عثمان، فرحان انصاري ۽ ٻين آءِ جي سنڌ سان ملاقات ڪئي. ميڊيا سان ڳالھائيندي عامر صديقي چيو ته آءِ جي سنڌ سان ملاقات ۾ شھر ۾ ھلندڙ ڊمبر ۽ حادثن بابت پنهنجي خدشن کان آگاهه ڪيو ويو. هن چيو ته ملاقات ۾ آءِ جي سنڌ يقين ڏياريو آھي ته ڊمبر ۽ ھيوي گاڏين جي  شهر ۾ داخلا جي حوالي سان ٽائمنگ مقرر ڪئي ويندي. متحده اڳواڻ چيو ته  ڊمپر جي ٽڪر سبب روزانو ڪيترائي ماڻھو اجل جو شڪار ٿين ٿا،  ڊمپر ھر ڏينھن غريب ماڻھن کي نشانو بڻائين ٿا. ھن چيو ته آء جي سنڌ کي ٻڌايو آھي ته ڊمپر مٿان پابندي لڳائي وڃي ۽ سپريم ڪورٽ جي حڪمن موجب ھيوي ٽريفڪ کي رات جي وقت روڊن تي اچڻ جي اجازت ڏني وڃي.