سنڌ حڪومت باضابطا طور گرين ۽ اورينج لائن بس سروس جو انتظام سنڀالي ورتو

سنڌ حڪومت باضابطا طور گرين ۽ اورينج لائن بس سروس جو انتظام سنڀالي ورتو. گرين ۽ اورينج لائن بس سروس اپريشنل ڪمانڊ اينڊ ڪنٽرول سينٽر گارڊن ڪراچي ۾ آپريشنل ڪنٽرول سنڌ حوالي ڪرڻ جي تقريب ٿي، جنهن ۾ سي اي او پي آءِ ڊي سي ايل وسيم باجوه ڪنٽرول سيڪريٽري ٽرانسپورٽ اسد ضامن حوالي ڪيو. تقريب ۾ سنڌ ماس ٽرانزٽ اٿارٽي جي ايم ڊي ڪمال دايو، گرين ۽ اورينج لائن بي آر ٽي جي عملدارن شرڪت ڪئي. سنڌ جي سينيئر وزير شرجيل انعام ميمڻ جو چوڻ آهي ته گرين ۽ اورينج لائن جي سنڌ حڪومت ڏانهن منتقلي پبلڪ ٽرانسپورٽ نيٽ ورڪ کي وڌيڪ منظم ڪرڻ طرف اهم قدم آهي، سنڌ سرڪار بس سروس جي بهتري لاءِ پرعزم آهي ته جيئن شهرين کي بهترين سفري سهولتون فراهم ڪري سگهجن. هن چيو ته هو جديد ٽيڪنالاجي جي استعمال ۽ باقاعده سار سنڀال ذريعي بس سروس جي ڪارڪردگي کي بهتر بڻائڻ لاءِ ڪم ڪندا. سنڌ جي سينيئر وزير شرجيل انعام ميمڻ چيو ته ڪراچي شهر لاءِ هڪ مضبوط شهري ٽرانزٽ سسٽم جوڙيو پيو وڃي، ٻنهي بي آر ٽي لائنن کي ٻين پبلڪ ٽرانسپورٽ سسٽمن سان ڳنڍڻ جا منصوبا جاري آهن.