- Advertisement -
ڊسٽرڪٽ بار سکر طرفان هٿياربندن هٿان قتل ٿي ويل پيرسن جي قتل ڪيس ۾ نوجوان وڪيل نديم لاشاري کي جوابدار نامزد ڪرڻ خلاف عدالتي ڪارواين جو بائيڪاٽ ڪيو ويو آهي.
جنرل سيڪريٽري ذوالفقار ملاڻو جو چوڻ هو ته وڪيل نديم لاشاري کي قتل ڪيس ۾ ناحق ڦاسايو پيو وڃي هو بيگناهه آهي.
سندس چوڻ هو ته ڪجهه ڏينهن اڳ فوتي تاج محمد لاشاري جي وارثن قانون جي شاگرد صدام لاشاري کي قتل ڪيو هو.
هن جو چوڻ هو ته جوابدار طرفان شاگرد صدام لاشاري جي قتل ڪيس مان بچڻ لاءِ وڪيل نديم لاشاري جو قتل ڪيس ۾ نالو ڏنو آهي.
سندس چوڻ هو ته ايس ايس پي سکر واقعي جي شفاف انڪوائري ڪرائي وڪيل نديم لاشاري جو نالو پيرسن تاج محمد لاشاري جي قتل ڪيس مان خارج ڪرائي انصاف فراهم ڪيو وڃي.
گذريل رات ايئرپورٽ ٿاڻي تي عورت مير زادي لاشاري جي فرياد تي قتل ٿي ويل مڙس تاج محمد لاشاري جي قتل جو ڪيس داخل ڪيو ويو، ڪيس ۾ 7 ڄڻن کي جوابدار نامزد ڪيو ويو آهي.
جوابدارن ۾ نوجوان وڪيل نديم لاشاري، آصف علي، عابد علي، عبدالحق، محمد اشرف، سليم ۽ لعل خان شامل آهن.
ڪيس ۾ موقف اختيار ڪيو ويو آهي ته جوابدارن سان خوني تڪرار هلندڙ آهي، زمين تي وڃي رهيا هئاسين ته نامزد جوابدارن حملو ڪري مڙس تاج محمد لاشاري کي قتل ڪيو آهي.
- Advertisement -
