دوداپور ڀرسان پورهيت جي گهر کي باهه لڳڻ سبب نينگري سڙي فوت

دوداپور ڀرسان چلهه مان چڻنگ اٿڻ سبب پورهيت جي گهر کي باهه لڳي وئي، جنهن ۾ نينگري سڙي فوت ٿي وئي. ڳوٺ علي شير لهر ۾ پورهيت گلبهار مري جي گهر کي باهه لڳي وئي، جنهن جي نتيجي ۾ سندس نينگري شمروز ۽ گهر ۾ پيل سمورو سامان سڙي ويو. اطلاع باوجود فائربرگيڊ عملو واقعي واري هنڌ نه پهچي سگهيو، ڳوٺاڻن پنهنجي مدد پاڻ تحت باهه تي ضابطو آڻي وڌيڪ نقصان ٿيڻ کان بچائي ورتو. نينگر جي سڙي فوت ٿيڻ تي گهر ۾ ڪهرام مچي ويو. متاثر گلبهار مري جو چوڻ هو ته باهه سبب سندس الهه تلهه سڙي ويو آهي، جنهن سبب هو کليل آسمان هيٺ ويٺل آهن.