روهڙي ۾ پراڻي ٽول پلازه ويجهو گهرو اڻبڻت تان ماءُ ۽ ڌيءُ قتل

روهڙي ۾ گهرو اڻبڻت تان ماءُ ۽ ڌيءُ کي قتل ڪيو ويو آهي. جهانگهڙو ٿاڻي جي حد پراڻي ٽول پلازه ويجهو جوابدار شير علي بکراڻي، پنهنجي ڀاڄائي نور خاتون ۽ ڀائٽي زاهده کي گوليون هڻي قتل ڪري ڇڏيو. اطلاع ملڻ بعد پوليس واقعي واري هنڌ پهچي لاش تحويل ۾ وٺي اسپتال پهچايا جتان ضروري ڪارروائي بعد مڙهه وارثن حوالي ڪيا ويا. ماءُ ۽ ڌيءُ جا لاش گهر ۾ پهچڻ تي ڪهرام مچي ويو. پوليس جو چوڻ آهي ته شير علي بکراڻي ۽ سندس ڀاءُ فيض علي بکراڻي ۾ گهرو اڻبڻت تان منهن ماري ٿي پئي هئي. پوليس موجب، جوابدار شير علي بکراڻي گوليون هڻي پنهنجي ڀاڄائي ۽ سندس نياڻي کي قتل ڪري ڇڏيو، جوابدار جي گرفتاري لاءِ ڇاپا هنيا پيا وڃن.