- Advertisement -
ٺري ميرواھ جي صحافي اي ڊي شر جي قتل واري واقعي ۽ ڪيس ۾ نامزد جوابدارن جي گرفتاري لاءِ شھر ۾ شٽربند ھڙتال ڪري 12 ڪلوميٽر ريلي ڪڍي وئي.
ميرواھ بچايو اتحاد جي سڏ تي ڳوٺ رسولپور کان 12 ڪلو ميٽر ريلي ڪڍي وئي، جنهن ۾ شهرين وڏي انگ ۾ ماڻھن جي شرڪت ڪئي.
شٽربند ھڙتال جي سڏ تي تعلقي ھيڊڪوارٽر شھر ۾ مک بازار سميت سمورا ڪاروباري مرڪز مڪمل طور بند رهيا.
احتجاج ڪندڙن جو چوڻ هو ته پوليس اي ڊي شر جي قتل ۾ ملوث مک جوابدار هن وقت تائين گرفتار ناهي ڪري سگهي، جوابدارن جي گرفتاري لاءِ سندن احتجاج جاري رهندو.
ٻئي طرف فيض گنج ۾ صحافين، سياسي سماجي اڳواڻن ۽ سول سوسائٽي طرفان مهراڻ هاءِ وي مين چوڪ کان پريس ڪلب تائين مظفر مصطفيٰ شر، محمد اقبال موريجو، هدايت علي ۽ ٻين جي اڳواڻي ۾ ريلي ڪڍي وئي.
فقير آباد ۾ به جي ڊبليو سي طرفان جي ايم چوڪ تي وفا جاگيراڻي، خورشيد، وحيد کوکر ۽ ٻين جي اڳواڻي ۾ احتجاجي مظاهرو ڪيو ويو.
هڱورجا ۾ خيرپور صحافي اتحاد جي سڏ تي صحافين غلام حسين چانگ، شمن راڄپر ۽ محمد صديق سولنگي جي اڳواڻي ۾ پريس ڪلب آڏو احتجاجي مظاهرو ڪري ڌرڻو هنيو ويو.
هنن مطالبو ڪيو ته معاملي جي جاچ لاءِ جي آءِ ٽي جوڙي حقيقتون عوام سامهون آنديون وڃن.- Advertisement -
