گڏيل قومن جي سلامتي ڪائونسل روس مخالف سموريون يورپي ترميمون رد, يوڪرين بابت آمريڪي ٺهراءُ منظور

گڏيل قومن جي سلامتي ڪائونسل روس مخالف سموريون يورپي ترميمون رد ڪندي يوڪرين بابت آمريڪي ٺهراءُ منظور ڪري ورتو. پرڏيهي خابرو اداري موجب گڏيل قومن ۾يوڪرين، يورپي يونين جي گڏيل ٺهراءُ ۽ آمريڪا جي ڌار ٺهراءُ  تي ووٽنگ ٿي. پهريان گڏيل قومن جي جنرل اسيمبلي ۾ يوڪرين جي علائقائي سلامتي جي حمايت ۽ روسي فوج جي فوري واپسي تي ٻڌل ٺهراءُ يوڪرين جنگ جو ٽيون سال مڪمل ٿيڻ تي پيش ڪيو ويو. يوڪرين ۽ يورپي يونين طرفان پيش ڪيل ٺهراءُ ۾ يوڪرين تي روسي حملي جو حوالو ڏيندي روسي فوج کي يوڪرين مان ٻاهر ڪڍڻ جو مطالبو ڪيو ويو. آمريڪا جي سخت مخالفت باوجود گڏيل قومن يورپي حمايت وارو ٺهراءُ ڳري اڪثريت سان منظور  ڪيو، 93 ملڪن ٺهراءُ جي حق ۾ ووٽ ڏنو، جڏهن ته روس، بيلاروس، اتر ڪوريا ۽ سوڊان وانگر آمريڪا به ٺهراءَ جي خلاف ووٽ ڏنو. ان کانپوءِ آمريڪا جي ڌار ٺهراءَ تي سلامتي ڪائونسل ۾ ووٽنگ ٿي، آمريڪي ٺهراءَ ۾ چيو ويو ته تڪرار جو فوري خاتمو ۽ يوڪرين ۽ روس وچ ۾ جٽادار امن قائم ڪيو وڃي، گڏيل قومن جو مک ڪردار عالمي امن ۽ تڪرارن جي خاتمي کي ممڪن بڻائڻ آهي. ٺهراءَ ۾ روسي فيڊريشن ۽ يوڪرين وچ ۾ تڪرار دوران موتن تي افسوس جو اظهار ڪيو ويو. سلامتي ڪائونسل روس مخالف سموريون يورپي ترميمون رد ڪندي يوڪرين بابت آمريڪي ٺهراءَ منظور ڪري ورتو. آمريڪا، روس، چين ۽ پاڪستان سميت 10 ملڪن ٺهراءَ جي حق ۾ ووٽ ڏنو، فرانس، برطانيا سميت 5 ميمبر غير حاضر رهيا.