سنڌ جي مختلف علائقن ۾ ڌار ڌار روڊ حادثن ۾ ٻه ڄڻا فوت ٿي ويا ۽ 6 ڄڻا زخمي ٿي پيا آهن.
ڪنڊيارو ويجهو قومي شاهراهه تي ٽرالر جو ٽڪر لڳڻ سبب موٽر سائيڪل تي سوار عبدالشڪور سومرو ٿڏي تي ئي فوت ٿي ويو ۽ رياض بلوچ زخمي ٿي پيو.
پوليس حادث واري هنڌ پهچي لاش ۽ زخمي کي کڻائي اسپتال منتقل ڪيو، جتان ضروري ڪارروائي بعد مڙهه وارثن حوالي ڪيو ويو.
مانجهند ويجهو ڳوٺ فقير داد کوسو وٽ انڊس هاءِ وي تي روڊ تي خراب حالت ۾ بيٺل ٽرالر سان پويان ايندڙ ٽرڪ ٽڪرائجي وئي.
حادثي ۾ ٽرڪ ڊرائيور فوت ٿي ويو ۽ 5 ڄڻا زخمي ٿي پيا.
اطلاع تي پوليس حادثي واري هنڌ پهچي لاش ۽ زخمين کي کڻائي مقامي اسپتال منتقل ڪيو، جتي ڊرائيور جي سڃاڻپ بلوچستان جي علائقي جعفرآباد واسي رانجهن ڀٽي طور ٿي آهي.
