سنڌ جي گورنر ڪامران ٽسوري موٽر وهيڪل ترميمي بل جي منظوري ڏئي ڇڏي، بل موجب، بي آر ٽي بسن ۾ اسپيشل ماڻهن لاءِ سيٽون نه رکڻ تي 500 رپيه ڏنڊ لاڳو ٿيندو جڏهن ته بسن ۾ سفر دوران پنجن سالن تائين جي ڄمار جا ٻارڙا ڀاڙي کان آجا قرار هوندا ۽ ڪوريڊور يا بس اسٽاپ تي سگريٽ پيئڻ ۽ نسوار کائڻ تي پابندي هوندي.
سنڌ جي گورنر ڪامران ٽسوري موٽر وهيڪل ترميمي بل 2023ع جي منظوري ڏئي ڇڏي.
بل ۾ پراونشل موٽر وهيڪل ايڪٽ 1965ع ۾ ترميم بابت قانون سازي ڪئي وئي آهي.
بل موجب، بي آر ٽي بسن ۾ اسپيشل ماڻهن لاءِ سيٽون رکڻ ۽ نشاندهي نه ڪرڻ تي 500 رپيه ڏنڊ لاڳو ٿيندو جڏهن ته بسن ۾ سفر دوران پنجن سالن تائين جي ڄمار جا ٻارڙا ڀاڙي کان آجا قرار هوندا.
بل ۾ چيو ويو آهي ته بي آر ٽي بسن ۾ داخل ٿيڻ ۽ ٻاهر نڪرڻ لاءِ مخصوص دروزارن جي استعمال جي ڀڃڪڙي تي هڪ هزار رپيا ڏنڊ ڏيڻو پوندو. بل موجب، سفر دوران ڪوريڊور يا بس اسٽاپ تي سگريٽ پيئڻ، نسوار کائڻ ۽ ٿڪ اڇلائڻ تي پابندي هوندي ڀڃڪڙي ڪرڻ تي هڪ هزار رپيا ڏنڊ مڙهيو ويندو.
