سنڌ حڪومت جي ايڪسائيز کاتي اهم قدم کڻندي گاڏين جي رجسٽريشن ۽ ٽرانسفر لاءِ بائيو ميٽرڪ تصديق لازمي ڪري ڇڏي.
سنڌ جي سينيئر وزير شرجيل انعام ميمڻ جو چوڻ آهي ته سمورين نين ۽ پراڻين گاڏين جي رجسٽريشن ۽ ٽرانسفر جي عمل دوران بائيو ميٽرڪ تصديق جي ضرورت پوندي، نئين پاليسي تحت تبديلي ٽن مرحلن ۾ لاڳو ڪئي ويندي.
هن چيو ته پهرين جولاءِ کان پهرين مرحلي ۾ نين گاڏين جي رجسٽريشن لاءِ بائيو ميٽرڪ تصديق لازمي هوندي، ٻئي مرحلي ۾ پهرين نومبر کان گاڏيون خريد ڪندڙن جي بائيو ميٽرڪ تصديق ٿيندي، ٽئين مرحلي ۾ گاڏي وڪرو ڪندڙ ۽ خريد ڪندڙ ٻنهي جي بائيو ميٽرڪ تصديق ڪئي ويندي.
سنڌ جي سينيئر وزير شرجيل انعام ميمڻ چيو ته هو ايڪسائيز کاتي ۾ سموري عمل کي وڌيڪ شفاف بڻائڻ لاءِ ڪم ڪري رهيا آهن، هي رڳو شروعات آهي، سنڌ حڪومت ان ڳالهه کي يقيني بڻائڻ چاهي ٿي ته سنڌ عوامي خدمت ۾ ڊيجيٽائزيشن بابت اڳتي وڌي.
سندس چوڻ هو ته گاڏين جي رجسٽريشن ۽ ٽرانسفر ۾ بائيو ميٽرڪ تصديق شفافيت کي هٿي وٺرائڻ ۾ پيڙهه جو پٿر ثابت ٿيندي.
سنڌ جي سينيئر وزير شرجيل انعام ميمڻ چيو ته بائيو ميٽرڪ تصديق سان خريدارن ۽ وڪرو ڪندڙن جي سڃاڻپ، گاڏين جي غيرقانوني منتقلي ۽ شهرين کي دوکي کان بچائڻ ۾ مدد ملندي، گاڏين جا مالڪ بائيو ميٽرڪ جي عمل کي مڪمل ڪرڻ لاءِ نادرا اي سهولت مرڪز يا ڪنهن به ڊسٽرڪٽ ايڪسائيز آفيس سان رابطو ڪري سگهن ٿا.
