سنڌ هاءِ ڪورٽ گم ٿيل ماڻهن جي بازيابيءَ بابت درخواستن تي ڪيس داخل ڪرڻ ۽ ايندڙ ٻڌڻي تي اڳڀرائي رپورٽ پيش ڪرڻ جو حڪم ڏئي ڇڏيو.
سنڌ هاءِ ڪورٽ گم ٿيل ماڻهن جي بازيابيءَ بابت درخواستن جي ٻڌڻي ٿي.
عدالت گم ٿيل ماڻهن جا ڪيس داخل ڪرڻ جو حڪم ڏئي ڇڏيو.
عدالت پوليس کي حڪم ڏنو ته حسن علي مگسي جي گم ٿيڻ جو ڪيس ڪلفٽن ٿاڻي ۾ داخل ڪيو وڃي.
عدالت قربان، عاشق ۽ سعدالله جي گم ٿيڻ جو ڪيس گلشن معمار ٿاڻي ۾ داخل ڪرڻ جو حڪم ڏئي ڇڏيو.
عدالت حڪم ڏيندي چيو ته ڪيس داخل ڪري جاچ رپورٽ ايندڙ ٻڌڻي تي عدالت ۾ پيش ڪئي وڃي.
جاچ آفيسر عدالت ۾ رپورٽ پيش ڪندي چيو ته محمد صديق سميت 4 ڄڻا گم نه پر جوابدار آهن، جيڪي نوري آباد پوليس کي گهربل هئا.
جاچ آفيسر چيو ته محمد صديق، قمر، فياض ۽ جهانگير خان ھن وقت ڄامشورو جيل ۾ آهن.
عدالت چئن ڄڻن جي بازيابيءَ بابت درخواستون اڪلائي ڇڏيون.
پوليس جو چوڻ آهي ته گم ٿيل شهري محمد عادل به گهر پهچي ويو آهي.
عدالت محمد عادل جي بازيابي بابت درخواست اڪلائي ڇڏي.
عدالت وڌيڪ گم ٿيل ماڻهن جي بازيابيءَ بابت گهرو کاتي، آءِ جي سنڌ ۽ ٻين واسطيدار ادارن کان رپورٽ طلب ڪندي ٻڌڻي ملتوي ڪري ڇڏي…….
