قانون واري وزير اعظم نذير تارڙ قومي اسيمبلي ۾ 27هين آئيني ترميم جو بل پيش ڪري ڇڏيو

قومي اسيمبلي اجلاس ۾ قانون واري وزير سينيٽر اعظم نذير تارڙ 27هين آئيني ترميم جو بل پيش ڪري ڇڏيو. اسپيڪر اياز صادق جي صدارت ۾ قومي اسيمبلي جو اجلاس جاري آهي، قانون واري وزير اعظم نذير تارڙ قومي اسيمبلي اجلاس ۾ 27هين آئيني ترميم جو بل منظوري لاءِ پيش ڪيو، ان موقعي تي مخالف ڌر طرفان سخت احتجاج ۽ گوڙ ڪيو ويو. قانون واري وزير اعظم نذير تارڙ جو چوڻ هو ته 27هين آئيني ترميم جو بل سينيٽ مان 2 ڏهائي 3 اڪثريت سان منظور ٿيو، گڏيل پارلياماني ڪميٽي ۾ اپوزيشن کي ويهڻ گهرجي ها. اعظم نذير تارڙ جو چوڻ هو ته دنيا ۾ آئيني معاملن لاءِ آئيني عدالتون هونديون آهن، ٻين ملڪن ۾ ججن جي مقرري جوڊيشل ڪميشن ذريعي ڪئي ويندي آهي، ميثاق جمهوريت ۾ به آئيني نظام جو بنيادي نقطو شامل هو. اعظم نذير تارڙ جو چوڻ هو ته سوموٽو ذريعي ملڪ جو معاشي نظام ويهاريو ويو، ڪٿان شروع ڪريون؟ ڇا چونڊيل وزيراعظم کي گهر موڪلڻ کان شروع ڪريون، اداڪارن جو ڪيس هجي، ڪسٽم سامان تي به سوموٽو ورتو پئي ويو، بل ۾ سوموٽو جو اختيار ختم ڪيو ويو آهي ۽ هڪ طريقيڪار واضح ڪيو ويو آهي. سندس چوڻ هو ته ماضي ۾ آرٽيڪل 200 تحت بدليون ٿيون، اهي چئلينج به ٿيون، جوڊيشل ڪميشن کي اختيار ڏنو ويو آهي ته اها جج صاحبن جي بدلي ڪري، جيڪڏهن جج صاحب انڪار ڪن ٿا ته کين بدلي ناهي ڪرائڻي ته اهي ريٽائرڊ تصور ڪيا ويندا. قانون واري وزير جو چوڻ هو ته پهريان صدر آرٽيڪل 200 تحت هاءِ ڪورٽ مان ٻئي هاءِ ڪورٽ ۾ بدلي تجويز ڪري سگهندو هو، چيف جسٽس کانپوءِ وزيراعظم جي تجويز تي صدر بدلي ڪري ڇڏيندو هو، جوڊيشل ڪميشن سپريم ڪورٽ ۽ آئيني عدالت جي 5 ججن ۽ اپوزيشن ۽ حڪومت کان 2-2 ميمبرن تي لاڳاپيل فيصلو ڪندي. سندس چوڻ هو ته ڪميشن کي اختيار ڏنو ويو ته اها فيصلو ڪري ۽ جج جي بدلي ڪري، جيڪڏهن ڪميشن جي حڪم تي جج ڪيڏانهن وڃڻ کان انڪار ڪري ٿو ته اهو رٽائر تصور ٿيندو، ڏٺو ويندو ته جج کي ڪيترا مهينا يا سال ڪٿي بدلي ڪري موڪلي سگهجي ٿو. اعظم نذير تارڙ جو چوڻ آهي ته صوبن جا معاملا، آئيني ڪيس آئيني عدالت ڏسندي، سپريم ڪورٽ ديواني ڪيسن سميت ڪل 62 هزار کان وڌيڪ ڪيس ٻڌندي، جيڪڏهن اها ترميم پاس ٿئي ٿي ته موجوده چيف جسٽس ئي آئيني ڪميشن ۽ ادارن جي سربراهي ڪندو. قانون واري وفاقي وزير جو چوڻ هو ته فوج جو هڪ ڪردار آهي، جڏهن ڀارت حملو ڪيو ته ايوان هن طرح ئي آباد هو، هن ايوان ڏٺو ته ڀارت خلاف سڀ متحد ٿي وياسين، ڀارت کان فتح کانپوءِ او آءِ سي ۽ عرب ملڪن ان جي ساراهه ڪئي ۽ ساٿ ڏنو. سندس چوڻ هو ته آرمي چيف جي اپائمنٽ آرمي ايڪٽ تحت ٿيندي آهي، فيلڊ مارشل هڪ رينڪ آهي جيڪا ڪيترن ئي ملڪن ۾ آهي، اهو اعزاز تاحيات رهندو آهي، اسان وار ڪميٽي جو حصو هئاسين، ڏٺوسين ته فوج جي سربراهه بهترين ڪارڪردگي ۽ مهارت جو مظاهرو ڪيو، فيلڊ مارشل جي رينڪ وٺڻ کانپوءِ ضروري سمجهيو ته ان کي آئيني حدن ۾ آندو وڃي. سندس چوڻ هو ته فوج ۾ مقرري رينڪ تحت ٿيندي آهي ۽ فيلڊ مارشل جو اعزاز تاحيات رهندو آهي، ماضي ۾ اسان ڏٺو ته اعليٰ عهدن تي مقرري جا اثر پيا آهن، پارليامان جي سپرميسي ۽ ٻنهي ايوانن جي فيصلن جي طاقت سڀني جي اڳيان آهي. اعظم نذير تارڙ جو چوڻ هو ته صدر جي لاءِ ڇوٽ جي تجويز ڏني وئي آهي، جيڪڏهن صدر ٻيهر پبلڪ آفيس ۾ اچي ٿو ته ڇوٽ ختم ٿي ويندي. سندس چوڻ هو ته هنن جي درخواست هوندي ته ان تي بحث ڪرايون ۽ پوءِ ان تي ووٽن ڪرايون، 59 مان 47 ترميمون آئيني عدالت قائم ڪرڻ جي لاءِ ڪرڻيون پيون، مخالف ڌر جي دوستن کي درخواست آهي ته هڪ ٻئي کي ٻڌن ۽ هڪ ٻئي جي رهنمائي ڪن.