آءِ ايم ايف پاڪستان جي نئين چونڊيل حڪومت سان گڏ ڪم ڪرڻ تي رضامندي ظاهر ڪري ڇڏي

آءِ ايم ايف پاڪستان جي نئين چونڊيل حڪومت سان گڏ ڪم ڪرڻ تي رضامندي ظاهر ڪري ڇڏي. ميڊيا بريفنگ ۾ آءِ ايم ايف جي ڊائريڪٽر ڪميونيڪيشن جولي ڪوزيڪ معاشي استحڪام بابت نگران حڪومت جي قدمن تي اطمينان جو اظهار ڪندي چيو ته نگران حڪومت جي دور ۾ اختيارين معاشي استحڪام کي برقرار رکيو. سندس چوڻ هو ته نگران حڪومت مهانگائي کي ڪنٽرول ۾ رکڻ ۽ پرڏيهي مٽاسٽا جا ذخيرا وڌائڻ لاءِ سخت مانيٽري پاليسي تي عمل ڪيو. آءِ ايم ايف جي ڊائريڪٽر ڪميونيڪيشن جولي ڪوزيڪ چيو ته 11 جنوري تي آءِ ايم ايف جي ايگزيڪيوٽو بورڊ اسٽينڊ بائي ارينجمينٽ جي پهرين جائزي جي منظوري ڏني، جنهن تحت پاڪستان کي هڪ ڏهائي 9 ارب ڊالر جاري ٿيا. هن چيو ته قرض پروگرام سان پاڪستان کي معاشي استحڪام جي ڪوششن ۾ مدد ڪري رهي آهي. آءِ ايم ايف جي ڊائريڪٽر ڪميونيڪيشن چيو ته قرض پروگرام ۾ مضبوط فوڪس ڪمزور طبقي  جو تحفظ آهي، پاڪستان ۾ ميڪرو اڪنامڪ استحڪام کي يقيني بڻائڻ لاءِ نئين حڪومت سان پاليسي تي ڪم ڪرڻ جا منتظر آهن ته جيئن وسيع اقتصادي استحڪام ۽ پاڪستاني شهرين جي خوشحالي کي يقيني بڻايو وڃي. جولي ڪزيڪ چيو ته پي ٽي آءِ باني جو آءِ ايم ايف کي خط سياسي معاملو آهي، ان بابت بحث نه ڪيو ويندو، آءِ ايم ايف پاڪستان جي اندروني سياسي معاملن ۾ بيان بازي نه ڪندي.