اسرائيلي فوج جا غزه تي ظلم جاري، گذريل 24 ڪلاڪن دوران وڌيڪ 86 فلسطيني شهيد

اسرائيلي فوج جا غزه تي ظلم جاري آهن، گذريل 24 ڪلاڪن دوران وڌيڪ 86 فلسطيني شهيد ٿي ويا جڏهن ته 131 زخمي ٿي پيا. فلسطيني ميڊيا جو چوڻ آهي ته 7آڪٽوبر کان هن وقت تائين اسرائيلي حملن ۾ شهيد فلسطينين جو انگ 30 هزار تائين پهچي ويو جڏهن ته 70 هزار کان وڌيڪ زخمي آهن. فلسطيني ميڊيا موجب، خان يونس جي عمارت جي ملبي مان 23 لاش هٿ آهن، بمباري سبب غزه جي 80 سيڪڙو آبادي بي گهر ٿي چڪي آهي جڏهن ته 500 کان وڌيڪ مسجدن کي شهيد ۽ گرجا گهرن کي تباهه ڪيو ڪيو آهي. فلسطيني ميڊيا موجب، اسرائيلي فوج 300 تعليمي ادارن ۽ 3 لک 60 هزار رهائشي يونٽن کي تباهه ڪيو آهي جڏهن ته بمباري ڪري 200 کان وڌيڪ ثقافتي هنڌن جو نالو نشان مٽائي ڇڏيو آهي. عرب ميڊيا جو وڌيڪ چوڻ آهي ته اسرائيل ڄاڻي واڻي سڄي غزه ۾ طبي سهولتن کي نشانو بڻايو، غزه جي 35 مان 31 اسپتال سروس کان محروم ٿي ويا آهن. ٻئي پاسي گڏيل قومن جو چوڻ آهي ته غزه جي ناقص صورتحال سبب بيماريون ڦهلجڻ جو خطرو آهي، صاف پاڻي جي کوٽ آهي، بيماريون پکڙجي رهيون آهن. گڏيل قومن جي رپورٽ موجب، فلسطيني پناهگير ڏکين حالتن کي منهن ڏئي رهيا آهن.