بلوچستان جي مختلف شهرن ۾ ٿيل برساتن سبب هيٺاهين وارا علائقا پاڻي هيٺ اچي ويا جڏهن ته گوادر ۽ مڪران جو ڪراچي سان رابطو ڪٽجي ويو.
موسميات کاتي جو چوڻ آهي ته 24 ڪلاڪن دوران گوادر ۾ 80 ملي ميٽر، اورماڙا ۾ 77، پسني ۾ 66 ۽ جيواڻي ۾ 40 ملي ميٽر برسات رڪارڊ ڪئي وئي.
موسميات کاتي موجب، ڪوئيٽا ۾ 24 ڪلاڪن دوران 12 ملي ميٽر، پنجگور ۾ 15، قلات ۽ تربت ۾ 11 ملي ميٽر برسات رڪارڊ ڪئي وئي.
موسميات کاتي جو چوڻ آهي ته خضدار، نوڪنڊي ۽ زوب ۾ پنج پنج ملي ميٽر، دالبندين ۾ 4 ۽ لسبيلا ۾ 3 ملي ميٽر برسات رڪارڊ ڪئي وئي.
گوادر، پسني، نوشڪي، نوڪنڊي ۽ بارکان ۾ برسات جو سلسلو جاري آهي، جنهن سبب هيٺاهين وارا علائقا پاڻي هيٺ اچي ويا آهن، ڪوئيڪ رسپانس ٽيمون ۽ سول انتظاميه امدادي ڪاررواين ۾ رڌل آهن.
ٻوڏ سبب مڪران ڪوسٽل هاءِ وي تي بسول نديءَ جي پل ٽٽي پئي، جنهن سبب هاءِ وي ٻن هنڌن تان بند ٿي ويو، گوادر ۽ مڪران جو ڪراچي سان زميني رابطو ڪٽجي ويو.
اورماڙا جي ٻهراڙي وارن علائقن ۾ به ٻوڏ واري صورتحال آهي، متاثر پنهنجي مدد پاڻ تحت محفوظ هنڌن ڏانهن منتقل ٿيڻ شروع ٿي ويا آهن.
چيف ميٽرولاجسٽ سردار سرفراز جو چوڻ آهي ته بلوچستان جي مختلف علائقن ۾ برسات جو سلسلو جاري آهي، بلوچستان جي سامونڊي علائقن مان تيز برساتن جون رپورٽون اچي رهيون آهن، بلوچستان کان هي سسٽم پنجاب ۽ خيبرپختونخوا ۾ داخل ٿي رهيو آهي، جنهن سبب پنجاب ۽ خيبرپختونخوا جي مختلف علائقن ۾ تيز برسات جو امڪان آهي.
موسميات کاتي موجب، اولهه هوائن جو سلسلو بلوچستان جي مختلف ضلعن ۾ موجود آهي جڏهن ته ڪوئيٽا ۽ ڀرپاسي ۾ اڄ موسم جهڙالي آهي، ڪجهه هنڌن تي گجگوڙ سان برسات پئجي سگهي ٿي.
گوادر، ڪيچ، آواران، چاغي، خاران، لسبيلا، خضدار، قلات، نوشڪي، جهل مگسي، ڪوئيٽا، نصيرآباد، سبي، ڪوهلو، ڊيرا بگٽي، لورا لائي، هرنائي، زيارت، چمن ۽ پشين ۾ برسات جو امڪان آهي.