بل گيٽس جون انسايت لاءِ خدمتون ساراهه جوڳيون آهن، حڪومت ملڪ مان پوليو جي خاتمي لاءِ سمورا وسيلا ڪتب آڻيندي : وزيراعظم

وزيراعظم شهبازشريف چيو آهي ته بل گيٽس جون انسايت لاءِ خدمتون ساراهه جوڳيون آهن، حڪومت ملڪ مان پوليو جي خاتمي لاءِ سمورا وسيلا ڪتب آڻيندي. پوليو جي خاتمي لاءِ قومي ٽاسڪ فورس جي اجلاس ۾ ڳالهائيندي وزيراعظم شهبازشريف چيو ته پاڪستان ۾ پوليو جي خاتمي، بنيادي صحت ۽ ٻارن جي واڌ ويجهه ۾ گيٽس فائونڊيشن جون خدمتون ساراهه جوڳيون آهن. هن چيو ته پاڪستان ۾ ٽن ورهين دوران پوليو جي خاتمي لاءِ مالي مدد ۾ اضافو ٿيو آهي، جن مان ٽيهه سيڪڙو بل گيٽس فائونڊيشن جو آهي، پوليو جي خاتمي لاءِ سعودي عرب ايندڙ پنجن ورهين ۾ پنجاهه ڪروڙ ڊالرن جي خاطري ڪرائي آهي. شهبازشريف چيو ته سرحدي چرپر سبب پوليو وائرس پاڪستان آيو، هو مسئلي کي چڱي نموني مهن ڏئي رهيا آهن، وفاقي سرڪار صوبائي حڪومتن سان گڏجي پوليو جي خاتمي لاءِ پرعزم آهي،. ان موقعي تي بل گيٽس چيو ته پاڪستان مان پوليو جي مڪمل خاتمي لاءِ ترجيحي بنيادن تي ڪم ڪرڻو پوندو، پاڪستان سان پوليو ۽ صحت جي ٻن شعبن ۾ ڪم ڪرڻ لاءِ هو پرعزم آهي، هتي ڊجيٽائيزيشن جو منصوبو سندن ترجيح آهي.