نگران ڪي پي حڪومت پاران صوبي جي چيئر لفٽس جي معائني جي هدايت

خيبرپختونخوا جي نگران حڪومت بٽگرام چيئر لفٽ حادثي کانپوءِ سموري ضلعن جي انتظاميا کي ڪمرشل ۽ رهائشي چيئرلفٽس جي معائني جو حڪم ڏيندي هڪ هفتي اندر رپورٽ طلب ڪئي آهي.

   ذريعن جو چوڻ آهي ته صوبي جي سڀني ضلعي جي ڊپٽي ڪمشنرز کي چيئرلفٽس جي معائني جي هدايت ڪندي هڪ هفتي اندر رپورٽ حڪومت کي جمع ڪرائڻ جو حڪم ڏنو ويو آهي.

نگران صوبائي حڪومت جو چوڻ آهي ته سمورن ڪمرشل، گهريلو، تفريحي هنڌن، دريائن ۽ ندين مٿان هلندڙ ٽريول چيئر لفٽن جي چيڪنگ ڪئي وڃي.

صوبائي حڪومت موجب سمورن لفٽن جي ڊيزائن، گنجائش ۽ حفاظتي قدمن جو معائنو ڪيو وڃي، ان کان علاوه چيئر لفٽ هلائڻ لاءِ ضلعي انتظاميا کان اين او سي وٺڻ لازمي هوندو.