ساوند ۽  سندراڻي تڪرار جو جرڳي ذريعي نبيرو ڪري ٻنهي ڌرين تي 6 ڪروڙ 36 لک ڏنڊ وڌو ويو

ساوند ۽  سندراڻي تڪرار جو جرڳي ذريعي نبيرو ڪري ٻنهي ڌرين تي 6 ڪروڙ 36 لک ڏنڊ وڌو ويو آهي. ساوند سندراڻي تڪرار جو نبيرو مهر سردار ۽ پ پ ايم اين اي  علي گوهر مهر جي ميزبانيءَ هيٺ گوهر پيلس خانڳڙهه ۾ ٿيو. جرڳي ۾ پ پ ايم اين اي سيد خورشيد شاهه، سردار عابد سندراڻي، ڊاڪتر علي نواز ساوند، ڊاڪٽر محمد طارق ساوند، محمد خان جوڻيجيَ، غوث بخش مهر، سردار جلال خان ڪلپر بگٽي، سردار محبوب بجاراڻي، مير شبير علي بجاراڻي، اصغر خان چاچڙ، مير احسان سندراڻي ۽ ٻنهي ڌرين جي چڱڻ مڙسن شرڪت ڪئي. جرڳي دوران ڌرين جون ڳالهيون ٻڌڻ بعد جرڳي امين فتويٰ پڙهي ٻڌائي، جنهن موجب ٻنهي ڌرين تي مجموعي  طور 6 ڪروڙ 36 لک رپيا ڏنڊ وڌو ويو. فتويٰ موجب سندراڻي برادريءَ تي ساوند برادريءَ جا تيرهن خون ثابت ٿيڻ 3 ڪروڙ 21 لک رپيا ۽ ساوند برادريءَ تي  سندراڻين جا 11 خون ثابت ٿيڻ تي 3 ڪروڙ 15 لک رپيا ڏنڊ وڌو ووي. تڪرار دوران مارجي ويل اجمل ساوند ۽ ايڊووڪيٽ نور الاهي سندراڻيءَ جي خون بها پنجوڻ تي هڪ هڪ ڪروڙ رپيا مقرر ڪئي وئي. ساوند برادريءَ 11 لک رپيا سندراڻين کي موقعي تي ادا ڪيا جڏهن ته سندراڻين 20 لک رپيا ادا ڪيا، رهيل رقم چئن قسطن ۾ ادا ڪئي ويندي. زخمي ڪريم بخش سندراڻيءَ پنهنجو 10 رپيا عيوضو ساوند برادريءَ کي بخشي ڇڏيو. فتويٰ موجب اڳرائي ڪندڙ ڌر تي 2 ڪروڙ ڏنڊ مقرر ڪيو ويو  آهي. نيبري بعد سردار علي گوهر مهر ۽ سيد خورشيد شاهه دعا گهرائي.