- Advertisement -
وزيراعظم شهباز شريف چيو آهي ته ڌرڻن دوران قانون هٿ ۾ کڻندڙن کي قانون موجب سزا ڏني وڃي، بيلا روس جي صدر جي دوري وقت تحريڪ انصاف اسلام آباد ۾ احتجاج ڪري ملڪ کي بدنام ڪيو، وڳوڙين جي حملي ۾ رينجرز ۽ پوليس اهلڪار شهيد ٿيا آهن، ملڪ ۾ 70 مهينن کانپوءِ مهانگائي گهٽ ترين سطح تي اچي وئي آهي، مهانگائي ۾ گهٽتائي سان عام ماڻهن تي بار گهٽ ۽ غربت ۾ گهٽتائي ٿيندي آهي، خواجه آصف ۽ سندس ٽيم جي ڪوششن سبب يورپ سڌي اڏامن جو مسئلو حل ٿي چڪو آهي.
وزيراعظم شهباز شريف جي صدارت هيٺ اسلام آباد ۾ 24 نومبر تي ڌرڻي ۾ وڳوڙن جي جاچ لاءِ جوڙيل ٽاسڪ فورس جو اجلاس ٿيو.
اجلاس ۾ وفاقي گهرو وزير محسن نقوي، اقتصادي معاملن واري وزير احد چيمه، قانون واري وفاقي وزير، اعظم نذير تارڙ، وزيراعظم جي صلاحڪار راڻا ثناءُ الله ۽ ٻين شرڪت ڪئي.
اجلاس دوران وزيراعظم کي بريفنگ ڏني وئي ته احتجاج واري هنڌ تان هٿيار، ڪارتوس، گولين جا خول ۽ ٻيون شيون هٿ ڪيون ويون آهن، سمورا ثبوت فارنزڪ لاءِ موڪليا ويندا.
بريفنگ ۾ ٻڌايو ويو ته واقعي واري هنڌ موجود وڳوڙين جي سڃاڻپ جو عمل به تيزي سان مڪمل ڪيو پيو وڃي، سڃاڻپ بعد سمورن وڳوڙين کي عدالتن ۾ پيش ڪيو ويندو.
اجلاس کي خطاب ڪندي وزيراعظم شهباز شريف چيو ته ملڪ ۾ ڏڦيڙ پکيڙيندڙن خلاف قانوني ڪارروائي بابت اڳڀرائي جو هفيوار جائزو ورتو ويندو، ڌرڻن دوران قانون جي ڀڃڪڙي ڪندڙن، سرڪاري ملڪيتن کي نقصان پهچائڻ ۽ قانون لاڳو ڪندڙ ادارن جي اهلڪارن کي زخمي ۽ شهيد ڪندڙن کي قانون موجب سزا ڏني وڃي.
سندس چوڻ هو ته ڏڦيڙ پکيڙيندڙ بيلاروس جي صدر جي پاڪستان جي دوري وقت ملڪ جي راڄڌاني تي حملو ڪيو، جيڪو شرمندگي جو سبب بڻيو، پاڪستان ۾ وقت جي گهرجن موجب عالمي سطح جي اينٽي رائٽ فورس ٺاهي وڃي.
وزيراعظم شهباز شريف چيو ته اسلام آباد سيف سٽي ۾ فارنزڪ ليب شامل ڪري ان کي عالمي معيار تي آندو ويندو ۽ ان لاءِ سمورا ضروري وسيلا ڪتب آندا ويندا.- Advertisement -
