ڪراچي: جوهر موڙ ڀرسان رهائشي عمارت ۾ هڪ ڄڻو قتل

ڪراچيءَ گلستان جوهر بلاڪ 19 واري علائقي ۾ اڻڄاتل جوابدار گھر ۾ گھڙي تيز ڌار اوزار سان هڪ شخص کي قتل ڪري فرار ٿي ويو، مقتول سول انجنيئر هو. پوليس جو چوڻ آهي ته جوهر موڙ ڀرسان فليٽ ۾ اڻڄاتل جوابدار راهول نالي شهري کي تيز ڌار واري اوزار سان قتل ڪرڻ کانپوءِ فرار ٿي ويو، واقعي وقت مقتول جي گهر واري به گهر ۾ موجود هئي. پوليس موجب، زال مڙس فليٽ ۾ اڪيلا رهندا هئا سندن شادي کي ڪجهه وقت ئي ٿيو هو، مقتول راهول ڪمار سول انجنيئر هو. پوليس جو چوڻ آهي ته جوابدار مقتول سان ڪجهه دير ڳالهيون ڪيون ۽ بعد ۾ کيس قتل ڪري فرار ٿي ويو. پوليس جو وڌيڪ چوڻ آهي ته فليٽ ۾ داخل ٿيندڙ ررستي تي لڳل سي سي ٽي وي ڪيمرائن جي مدد سان شڪي شخص جا فٽيج حاصل ڪيا آهن، جڏهن ته مقتول راهول ڪمار جي گهر واري کان به پڇا ڳاڇا ڪئي پئي وڃي.