سنڌ جي مختلف شهرن ۾ پاڻي جي کوٽ خلاف احتجاجي مظاهرا

سنڌ جي مختلف شهرن ۾ پاڻي جي کوٽ خلاف احتجاجي مظاهرا ڪري ڌرڻا هنيا ويا. ڪڙيو گهنور ۾ پاڻي جي کوٽ خلاف آبادگارن ۽ هارين پاران نئون واهه پل تي ڌرڻو هڻي آبپاشي عملدارن خلاف نعريبازي ڪئي. گولاڙچي ۾ پاڻي جي کوٽ خلاف آبادگارن پاران حيدرآباد روڊ تي ڌرڻو هڻي نعريبازي ڪئي. سن ۾ شاهه اويس ڪينال جدوجهد ڪميٽي پاران پڇڙي ۾ پاڻي جي کوٽ خلاف احتجاجي مظاهرو ڪيو ويو. احتجاج ڪندڙن جو چوڻ هو ته آبپاشي عملدار پاڻي جي کوٽ جو بهانو بڻائي آبادگارن  ۽ هارين جو معاشي قتل عام ڪري رهيا آهن. هنن چيو ته پاڻي جي کوٽ سبب ساريالو فصل سڪي تباهه ٿي رهيو  آهي، پر ڪير به ٻڌڻ وارو ناهي. اڳواڻن اعليٰ اختيارين کان مطالبو ڪيو ته معاملي جو نوٽيس وٺي پاڻي جي هٿرادو کوٽ ختم ڪري آبادگارن ۽ هارين کي معاشي بدحالي کان بچايو وڃي…..