سنڌ حڪومت موسمياتي سمارٽ ٽيڪنالوجي متعارف ڪرائي ڇڏي

زرعي شعبي کي ھٿي وٺرائڻ ۽ موسمياتي تبديلي جي اثر کي منھن ڏيڻ لاءِ موسمياتي اسمارٽ ٽيڪنالاجي متعارف ڪرائي ڇڏي. زراعت واري صوبائي وزير محمد بخش مھر جديد زرعي پيداوار، موسمياتي اسمارٽ ٽيڪنالاجي منصوبي جو افتتاح ڪيو. صوبائي وزير ڪيلي ۾ پناما ويلٽ بيماري کي روڪڻ، وونئڻن جي جلد پوکائي ۽ زرعي ٻجن ۾ جراثيم جي باقيات جو تجربو ڪرڻ لاءِ ايم آر ايل ليبارٽري جو افتتاح ڪيو. تقريب ۾ سيڪريٽري زراعت سھيل احمد قريشي، ڊي جي ريسرچ، آبادگار اڳواڻ سيد نديم شاھ ڄاموٽ، نبي بخش سيٺيو، زرعي سائنٽسٽ ۽ ٻيا آفيسر موجود ھئا ان موقعي تي صوبائي وزير محمد بخش مھر چيو ته ملڪ ۾ موسمياتي تبديلي جي سبب زراعت کي نقصان پھچي رھيو آھي، سمارٽ ٽيڪنالاجي سان ڪڻڪ جي پوک ۾ پاڻي جي 25 کان 30 سيڪڙو تائين بچت ۽ 10 کان 15 فيصد واڌ ٿيندي. محمد بخش مهر چيو ته ڊبلنگ ميٿڊ ذريعي ڪڻڪ جي پوکائي سان ٻج جي استعمال ۾ 60 فيصد گھٽتائي آڻي سگھبي، سرنھن جھڙي گھٽ پاڻي واري فصل جي پوکائي خشڪ سالي دوران ھڪ بھتر متبادل ثابت ٿي سگھي ٿي. سندس چوڻ هو ته موسمياتي تبديلي کي منھن ڏيڻ لاءِ وونئڻن جي جلد پوکائي ۽ جديد ايم آر ايل ليبارٽري جو قيام به شامل آھي، جديد ٽيڪنالاجي سنڌ جي زرعي پيداوار کي ايندڙ چيلنجز کي منھن ڏيڻ لاءِ مددگار ثابت ٿيندي. هن چيو ته جديد زرعي پيداوار ڪلائمٽ سمارٽ ٽيڪنالاجي سان آبادگارن جي آمدني ۾ بھتري ايندي، موسمياتي سمارٽ ٽيڪنالاجي سان صوبي ۾ زرعي شعبي کي ترقي ۽ آبادگارن جي خوشحالي ۾ مدد ملندي.