وزيراعظم شهباز شريف 28 اپريل تي سعودي عرب جو دورو ڪندو، پاڪستان ۽ ايران طرفان هڪ ٻئي جي قيدين کي آزاد ڪرڻ جو فيصلو ڪيو ويو آهي، پرڏيهي آفيس جي ترجمان ممتاز زهرا بلوچ جو چوڻ آهي ته پاڪستان ۽ ايران وچ ۾ ٻه طرفا مضبوط لاڳاپا قائم آهن، ٻنهي ملڪن جو غزا تي موقف ساڳيو ئي آهي، ايراني صدر جي دوري دوران ٻه طرفا لاڳاپا مضبوط ڪرڻ تي ڳالهيون ٿيون آهن، غزا ۾ فلسطينين جي نسل ڪشي فوري طور ختم ٿيڻ گهرجي، اسرائيلي ظلمن جي عالمي سطح تي جاچ ڪئي وڃي.
اسلام آباد ۾ هفتيوار بريفنگ ڏيندي ممتاز زهرا بلوچ چيو ته وزيراعظم شهباز شريف 28 اپريل تي سعودي عرب جو دورو ڪندو.
سندس چوڻ هو ته وزيراعظم شهباز شريف ۽ پرڏيهي وزير اسحاق ڊار رياض ۾ عالمي اقتصادي فورم ۾ شرڪت ڪندا، وزيراعظم سعودي ولي عهد محمد بن سلمان سان به ملاقات ڪندو.
پرڏيهي آفيس جي ترجمان ممتاز زهرا بلوچ چيو ته ورلڊ اڪنامڪ فورم جي موقعي تي وزيراعظم شهباز شريف ٻين عالمي اڳواڻن سان به ملاقات ڪندو، وزيراعظم مئي ۾ او آءِ سي اجلاس ۾ شرڪت لاءِ گمبيا جو دورو ڪندو.
هن چيو ته ايراني صدر ٽن ڏينهن وارو پاڪستان جو دورو ڪيو، ٻنهي ملڪن مختلف شعبن ۾ سهڪار بابت ڳالهيون ڪيون، پاڪستان ۽ ايران طرفان هڪ ٻئي جي قيدين کي آزاد ڪرڻ جو فيصلو ڪيو ويو.
پرڏيهي آفيس جي ترجمان چيو ته پاڪستان ۽ ايران وچ ۾ ٻه طرفا مضبوط لاڳاپا قائم آهن، ٻنهي ملڪن جو غزا تي موقف ساڳيو ئي آهي، ايراني صدر جي دوري دوران ٻه طرفا لاڳاپا مضبوط ڪرڻ تي ڳالهيون ٿيون آهن.
ممتاز زهرا بلوچ چيو ته غزا ۾ فلسطينين جي نسل ڪشي فوري طور ختم ٿيڻ گهرجي، اسرائيلي ظلمن جي عالمي سطح تي جاچ ڪئي وڃي.
پرڏيهي آفيس جي ترجمان ممتاز زهرا بلوچ چيو ته پاڪستان کي والاريل ڪشمير جي صورتحال تي ڳڻتي آهي، والاريل ڪشمير عالمي سطح تي تڪراري علائقو آهي.
