لاڙڪاڻو: اين پي پي سربراهه غلام مرتضيٰ جتوئي خلاف داخل ٻن ڪيسن جي ٻڌڻي 3ڊسمبر تائين ملتوي

اين پي پي سربراهه غلام مرتضيٰ جتوئي ڏوڪري ۽ باڊهه ٿاڻن ۾ داخل ڪيسن جي سلسلي ۾ لاڙڪاڻي جي عدالت ۾ پيش ٿيو، 27هين ترميم سبب عدالت جو ڪم معطل هئڻ سبب ڪيس جي ٻڌڻي 3 ڊسمبر تائين ملتوي ڪئي وئي. ان حوالي سان وڪيل مجاهد علي جتوئي ميڊيا سان ڳالهائيندي چيو ته اين پي پي اڳواڻ غلام مرتضيٰ جتوئي ڏوڪري ۽ باڊهه ٿاڻن تي داخل ڪيسن جي سلسلي ۾ عدالت ۾ پيش ٿيو. سندس چوڻ هو ته عدالت ۾ 27هين ترميم سبب وڪيلن جو عدالتي ورڪ سسپينڊ هئڻ سبب 3 ڊسمبر جي تاريخ ڏني وئي آهي، عدالتي ڪارروائي ملتوي ٿيڻ کان پوءِ غلام مرتضي2 جتوئي هاءِ ڪورٽ بار لاڙڪاڻو جي صدر اطهر عباس سولنگي طرفان سندس اعزاز ۾ رکيل چانهه پارٽي ۾ شرڪت لاءِ هاءِ ڪورٽ بار روانو ٿي ويو. هاءِ ڪورٽ بار ۾ صدر اطهر عباس سولنگي جي نگراني هيٺ رٿيل تقريب ۾ وڪيلن وڏي انگ ۾ شرڪت ڪئي.