موسمياتي تبديلين سبب زراعت کي تمام گهڻو نقصان ٿيو آهي؛ پير پاڳارو

حرن جي روحاني پيشوا پير پاڳاري چيو آهي ته موسمياتي تبديلين سبب زراعت کي تمام گهڻو نقصان ٿيو آهي، معاشي طور بحالي لاءِ چوپايو مال پالڻ گهرجي، پاڪ فوج جو احترام ڪري اداري جو احترام ڪيو وڃي، ڪمزور فوج وارا ملڪ تباهه ٿي ويندا آهن. حرن جو روحاني پيشوا پير پاڳارو مديجي جي آئيجو ڳوٺ ۾ فقير علي نواز ناريجو ۽ فقير احمد نواز جي چانهه پارٽي ۾ شرڪت ڪئي، جتي سنڌ سميت ملڪ جي ترقي ۽ سلامتي لاءِ دعا گهري وئي. پير پاڳاري مريدن کي پيار، محبت ۽ ڀائيچاري سان هلڻ هڪٻئي جي ڏک سک ۾ ساٿ ڏيڻ توڙي نياڻين کي تعليم ڏيارڻ جو پيغام ڏنو. پير پاڳاري ڳوٺ خدابخش بروهي پهتو جتي فقير محمد خان بروھي، حاجي سڪندر بروھي، گلزار بروهي، خدابخش بروهي ۽ ٻين گلن سان آجيان ڪئي ۽ سنڌ جي ثقافت ٽوپي اجرڪ پيش ڪيو. پير پاڳاري مريدن کي ديدار ڪرايو ۽ خير جي دعا گهري. پير پاڳاري مرزا پور ۾ رات گذاري ۽ ڳوٺ علي محمد ڪيهر ۾ فقير غلام عباس ڪيهر جي دعوت ۾ شرڪت ڪئي. ان موقعي تي مريدن کي ديدار ڪرايو ۽ خطاب ڪندي چيو ته موسمياتي تبديلين سبب زراعت کي تمام گهڻو نقصان ٿيو آهي، معاشي طور بحالي لاءِ چوپايو مال پالڻ گهرجي، پاڪ فوج جو احترام ڪري اداري جو احترام ڪيو وڃي، ڪمزور فوج وارا ملڪ تباهه ٿي ويندا آهن. خطاب بعد حرن جو روحاني پيشوا پير پاڳارو، خليفي مينهل فقير جي دعوت تي پهريون ڀيرو نئون ديرو ڀرسان سعدو ديرو وٽ سکر – لاڙڪاڻو روڊ تي قائم ڪيل ميڙاڪي واري هنڌ پهتو. ميڙاڪي واري هنڌ جهڏي کان پهتل جيوڻ فقير پيرن ۾ ڇير پائي پير پاڳاري جي آمد جي خوشيءَ ۾ روايتي رقص پيش ڪيو. پير پاڳاري جي آمد تي جماعت جي فقيرن، عقيدتمند ۽ مريدن جذباتي انداز ۾ ڀيڄ پاڳارا جا نعرا هنيا. پير پاڳاري ميڙاڪي واري هنڌ قائم ڪيل روايتي ٿلهي تي اچي فقيرن، عقيدتمند ۽ مريدن کي ديدار ڪرايو ۽ اجتماعي طور ملڪ جي خوشحالي ۽ سلامتي لاءِ دعا گهري. ميڙاڪي واري هنڌ پير پاڳاري جي ناشتي جو خصوصي انتظام پڻ ڪيو ويو جڏهن ته شريڪ فقيرن کي پڻ ننگر ڪرايو ويو………