ميلبرن ٽيسٽ ۾ آسٽريليا دلچسپ مقابلي بعد پاڪستان کي 79 رنسن تان شڪست ڏئي ڇڏي

ميلبرن ٽيسٽ ۾ آسٽريليا دلچسپ مقابلي بعد پاڪستان کي 79 رنسن تان شڪست ڏئي ڇڏي. ميلبرن ٽيسٽ جي چوٿين ڏينهن آسٽريليا ڇهن وڪيٽن جي نقصان تي 187 رنسن تان  اننگز جي شروعات ڪئي ته پوري ٽيم 84 ڏهائي هڪ اوورن ۾ 262 رنسون ٺاهي آل آئوٽ ٿي وئي، پاڪستان کي کٽڻ لاءِ 317 رنسن جو حدف مليو. قومي ٽيم چوٿين ڏينهن ٻي اننگز ۾ نون وڪيٽن جي نقصان تي 237 رنسون ٺاهي آئوٽ ٿي وئي، ڪپتان شان مسعود 60، آغا سلمان 50 ۽ بابر اعظم 41 رنسون ٺاهي نمايان رهيا. آسٽريليا طرفان پيٽ ڪمنز 5، مچل اسٽارڪ 4 ۽ هيزل ووڊ هڪ وڪيٽ حاصل ڪئي. ٽن ميچن تي ٻڌل ٽيسٽ سيريز ۾ آسٽريليا ٻڙي جي ڀيٽ ۾ 2 ميچون کٽي فيصلائتي سرسي حاصل ڪري ورتي آهي، آخري ميچ 3 کان ست جنوري تائين سڊني ۾ کيڏي ويندي.