- Advertisement -
ميڪسيڪو جي شهرين غزه ۾ جنگ بندي نه ڪرڻ تي اسرائيلي سفارتخاني آڏو احتجاجي مظاهرو ڪيو، جنهن دوران پوليس ۽ مظاهرين وچ ۾ چڪريون به ٿيون.
پرڏيهي ميڊيا رپورٽ موجب ميڪسيڪو جي راڄڌاني ۾ وڏي تعداد ۾ ماڻهن اسرائيل سفارتخاني آڏو ٿيل مظاهري ۾ شرڪت ڪئي.
احتجاجي مظاهري دوران پوليس ۽ مظاهرين وچ ۾ چڪريون به ٿيون.
ميڊيا رپورٽ موجب پوليس طرفان مظاهرين کي ڇڙ وڇڙ ڪرڻ لاءِ ڳوڙها آڻيندڙ گيس جو استعمال ڪيو ويو ۽ پٿراءُ به ٿيو، مڇريل ماڻهن سفارتخاني ٻاهران لڳل بيريئر هٽائڻ جي ڪوشش ڪئي وئي ۽ اسرائيل سفارتي حدن ۾ بوتل بم به اڇلايا ويا، جنهن سان باهه ڀڙڪي اٿي، جڏهن ته اسرائيلي سفارتخاني جي عمارت حملي ۾ مڪمل طور محفوظ رهي.
اسرائيلي ميڊيا موجب مظاهرين ۽ پوليس ۾ چڪرين دوران ڪيترائي اهلڪار ۽ مظاهرو ڪندڙ زخمي به ٿيا آهن.
اسرائيلي ميڊيا موجب چڪرين دوران بس اسٽيشنن، پوليس جي وين ۽ ڪاروبار کي به نقصان پهتو آهي.
ٻي طرف اسرائيل جي قومي سلامي ڪميٽي جي وزير طرفان جاري ڪيل بيان ۾ چيو ويو ته وڏي حصي تي اسرائيلي فورسز پنهنجو ڪنٽرول قائم ڪري چڪي آهي ۽ حماس سان جنگ وڌ کان وڌ 2024 جي آخر تائين هلي سگهي ٿي.
اسرائيلي فورسز آچر ڏهاڙي رفح ۾ گڏيل قومن طرفان سيف زون قرار ڏنل مهاجرين جي ڪيمپ تي بمباري ڪئي هئي، جنهن جي نتيجي ۾ 45 فلسطيني شهيد ۽ ڪيترائي سڙي زخمي ٿيا هئا…- Advertisement -
