هيليڪاپٽر حادثي ۾ فوت ٿيل ايراني صدر ابراهمي رئيسي ۽ سندس ساٿين جون آخري رسمون شروع ٿي ويون

هيليڪاپٽر حادثي ۾ فوت ٿيل ايراني صدر ابراهمي رئيسي ۽ سندس ساٿين جون آخري رسمون شروع ٿي ويون آهن، تبريز ۾ جنازي نماز بعد مڙهه تهران منتقل ڪيا ويندا، ابراهيم رئيسي کي اباڻي علائقي مشهد ۽ ٻين کي پنهنجن پنهنجن اباڻن علائقن ۾ مٽيءَ ماءُ حوالي ڪيو ويندو. جنازي نماز جي تقريب اڱاري ڏينهن صبح جو شروع ٿي، سوڳوارن تبريز ۾ ايران  جي قومي جهنڊي وارن تابوتن سان مارچ ڪيو. هزارين سوڳوار تبريز جي امام خميني موصل ۾  گڏ ٿيا، جتي جنازي نماز ادا ڪئي وئي. تبريز ۾ جلوس کانپوءِ ايراني صدر ابراهيم رئيسي ۽ سندس ساٿين جا مڙهه  هڪ ٻي تقريب لاءِ قــُـمُ ۾ بيبي معصومه جي روضي تي منتقل ڪيا ويندا. رئيسي ۽ سندس ساٿين جا مڙهه اربع ڏينهن تهران منتقل آندا ويندا، جتي سپريم ليڊر آيت الله خامنه اِي جنازي نماز پڙهائيندو، جنهن ۾  شهرين سميت پرڏيهي مهمان به شرڪت  ڪندا، امام خميني جي مزار تي کين الوداعي سلام پيش ڪيو ويندو. جنازي نماز بعد ڪجهه جي تدفين تهران ۽ ٻين جي اباڻن قبرستانن ۾ ڪئي ويندي. اربع جي شام جو ئي شهيدن کي ڀيٽا پيش ڪرڻ لاءِ تقريب ڪوٺائي ويندي، خميس ڏينهن ايراني صدر ابراهيم رئيسي جو مڙهه سندس اباڻي شهر مشهد آندو ويندو، جتي ٻيهر جنازي نماز ٿيندي ۽ اتي ئي کيس مٽيءَ ماءُ حوالي ڪيو ويندو. ايراني صدر ابراهيم رئيسي ۽ سندس ساٿين جي فوت ٿيڻ تي ايران ۾ پنجن ڏينهن جو سوڳ ملهايو پيو وڃي، جنهن دوران سموريون سرڪاري سرگرميون معطل ۽ قومي جهنڊو جهڪيل آهي