سگريٽ سيڪٽر ۾ 300 ارب رپين کان وڌيڪ ٽيڪس چوري بابت هو آگاهه آهن: خواجه آصف

بچاءَ واري وزير خواجه آصف چيو آهي ته سگريٽ سيڪٽر ۾ 300 ارب رپين کان وڌيڪ ٽيڪس چوري بابت هو آگاهه آهن، غير قانوني ڪاروبارن خلاف گهيرو تنگ ڪيو پيو وڃي. اسلام آباد ۾ نيشنل يونيورسٽي آف سائنسز اينڊ ٽيڪنالاجي طرفان “پاڪستان ۾ سگريٽ جي غير قانوني واپار، موجوده صورتحال ۽ ايندڙ حڪمت عملي” جي عنوان سان  هڪ جاچ رپورٽ جي لانچنگ تقريب ڪوٺائي وئي، جنهن ۾ بچاءِ واري وزير خواجه آصف ۽ ٻين شرڪت ڪئي. نسٽ جي رپورٽ ۾ چيو ويو ته سگريٽ واهپيدارن جي غيرقانوني سگريٽن طرفان وڌندڙ لاڙي سبب ملڪي خزاني کي ساليانو 310 ارب رپيا کان وڌيڪ نقصان ٿي رهيو آهي. رپورٽ موجب جيڪڏهن غيرقانوني سگريٽ جو واپار پکڙجندو رهيو ته 2024ع جي پڄاڻيءَ تائين ان جو مجموعي مارڪيٽ ڪاٿو 60 سيڪڙو کان به وڌي ويندو. تقريب کي خطاب ڪندي خواجه آصف چيو ته ٽرڪي اينڊ ٽريس سسٽم ذريعي  رڳو ان صورت ۾ فائدو حاصل ڪري سگهجي ٿو جڏهن  پرچوجن جي سطح تي ڀرپور انداز ۾ ان کي لاڳو ڪيو وڃي. هن چيو ته ٽيڪس چوري خلاف حڪومت جون ڪارروايون فائديمند ثابت ٿي رهيون آهن،  جنهن جو تازو مثال 4 ارب غير قانوني سگريٽن جي ڪچي مال جو هٿ اچڻ آهي،  اسلام آباد، ملتان ۽ ڄامشوري ۾ غيرقانوني سگريٽن جي ڪاروبار ۾ ملوث فيڪٽريون سيل ڪيون ويون آهن.